弊傢伙，香港人嘅私隱線再一次春光乍洩，呢個走光，嗰個露底！
個人資料私隱專員公署批評，有十一間中學以及專上院校嘅網站洩露學生檔案，涉及八千五百零五人嘅私隱。公署發現有九間中學網站披露咗二千幾個學生嘅個人資料，包括姓名、學生編號、學生同家長嘅電話以及電郵。由於學生編號係由教育局分配，基本上同出世紙以及身份證號碼一模一樣，萬一資料落入不法之徒手中，隨時用作詐騙做世界。你知啦，學生哥好多時候真係年少無知，話唔定再有人相信同神棍上床可以改運㗎。
個人資料一洩如注嘅事件之中，受影響最嚴重嘅係嶺南大學持續進修學院，私隱線失守嘅六千二百幾人係該校學生。私隱專員蔣任宏就話嘞，事件反映教育機構喺保障個人資料方面欠缺警覺性，網上保安明顯不足。蔣專員仲話，兩間專上院校嘅資訊科技及資源都較中學優勝，理應喺保障網上個人私隱方面做得更好，兩校嘅表現令人失望。
一方面批評教育機構洩露私隱，另一方面蔣任宏又話，私隱保障權唔係絕對嘅。咦，到底專員先生講緊乜乜東東呢？哦，原來係咁，根據新制訂嘅《公司條例》相關附屬法例，公眾同傳媒日後唔可以再透過公司註冊處，查閱公司董事嘅完整身份證號碼以及住址。呢一單嘢近日引起高度關注，因為禁止查冊有損公眾知情權。所以蔣任宏就話嘞，歡迎修訂《公司條例》加強保障註冊公司董事嘅個人資料，但私隱保障唔係絕對嘅，要視乎涉及邊一類人士。蔣專員仲話呀，呢啲問題都有待釐定附屬法例嘅時候取得平衡。
講到呢度，大家可能覺得有少少頭暈暈，等功夫茶扼要說明一下啦。即係咁，家陣出現咗兩種情況，第一種係個人私隱線應該嚴守就失守，第二種係公眾知情權應該擁有就未有。喂，如果公眾同傳媒日後真係唔可以查冊，咪等於放任貪官同奸商為所欲為？
假設吖，現已涉嫌貪污被捕嘅前任政務司司長許仕仁，唔知點解居然係十間八間神秘公司嘅神秘股東，傳媒冇得查冊好大鑊喎，根本冇辦法揭發有人官商勾結利益輸送，導致財富與官職收入不相稱。再假設吖，前任特首曾蔭權又一次企圖入住「豪華廉租屋」，傳媒冇得查冊又點知放租嘅業主係唔係另一個超級富豪呀？
所以計功夫茶話齋，蔣任宏千祈唔好下巴輕輕講過就算，必須確保「私隱保障唔係絕對」嘅大原則，新制訂嘅《公司條例》唔應該成為官商勾結嘅擋箭牌。簡單咁講，禁止查冊萬萬不能！