人多到底係咪好辦事嘅呢？擔擔抬抬可能係嘅，水貨客嗰種螞蟻搬家當然愈多螞蟻愈好，之但係一講到用腦思考，人多不但未必好辦事，反而有機會人多口雜誤大事。
嗱，等功夫茶舉一個例子吖，棋王之所以係棋王，梗係腦筋靈活特別刁鑽㗎啦，假如有好多人喺背後吱吱喳喳不斷提供意見，你估棋王仲有冇可能贏棋吖嗱？要用腦思考嘅時候，人多嘅意見往往係平庸嘅意見，三個臭皮匠冇可能勝過一個諸葛亮。
好嘞，過氣特首曾蔭權以廣納意見為名，將策略發展委員會同中央政策組非全職顧問制度不斷膨脹，人數愈來愈多，結果搞成點？傻嘅都睇得出啦，呢兩個原本最重要嘅中央諮詢架構，已經淪為大而無當嘅吹水組織，空談誤港咁解。
貪曾七年任內將原本只有十幾人嘅策發會，膨脹至最多超過一百五十人，離任前委任嘅最近一屆仍有近七十人，為嘅係乜呢？唔好以為真係廣納意見，呢一種派餅仔嘅做法叫做政治酬庸，名義上人人都係智囊，實際上個個都係窩囊。
消息人士指出，當今特首梁振英以及中策組首席顧問邵善波，有意將中策組現有四十二名非全職顧問適量縮減，由明年初起集中委任名副其實嘅專家學者同工商精英，又會更改「非全職顧問」呢一個不倫不類嘅職銜。簡單咁講，梁振英有意大刀闊斧改革策發會同中策組嘅非全職顧問制度，重新奉行精兵制，將兩個組織嘅人數大幅減至最多二、三十人，希望可以扭轉策發會同中策組吹水唔抹嘴嘅不良形象。
如果真係重新奉行精兵制，功夫茶當然唔反對啦。正如城大專業進修學院學術統籌宋立功話齋，策發會同中策組非全職顧問精兵簡政嘅方向正確，因為策發會成員近年被前朝政府視作花瓶，令部分成員心灰意冷，加上客觀事實係新政府被外間孤立，好多人未必有意思加入。
中央諮詢架構嘅人數固然應該貴精不貴多，另一個更加關鍵嘅重點係，千祈唔好講大話。貪曾當年將策發會人數增加到一百五十四人，其中一個目的係利用大量自己友臭味相投嘅意見，製造社會達成共識嘅假象。咁有誤導成分嘅所謂智囊，唔炒魷都冇天理啦！
總而言之，諸葛亮一個就夠，有料到嘅智囊唔使多o架，人少少反而效率高。打個譬喻吖，如果有人話美國總統做得差，唔通選民選出十個總統去共同治國咩？咪玩啦，十個總統肯定天下大亂，白宮日日內訌都有之！