開講有話，金錢唔係萬能，冇錢萬萬不能。真係冇講錯㗎，尤其對於港產官僚而言，乜嘢都同市民講錢，好似唔收錢就唔識做嘢咁。嗱，環保署官員話喎，垃圾徵費第一階段諮詢顯示有六成市民支持，第二階段諮詢將會參考台灣和南韓嘅經驗，研究點樣收費。所以話，港府搞環保，冇錢唔識做。
冇錯，香港地少人稠，固體廢物愈來愈多，堆填區好快就爆棚，問題迫在眉睫，唔解決唔得，之不過，徵費係咪就可以解決垃圾問題呢？即係咁，保護環境，人人有責，如果付出少少金錢就有助環保，相信市民唔介意，最怕錢就收咗，垃圾冇少到，咁又點計數先？好似膠袋徵費咁，膠袋使用量係就係少咗，弊在更難分解嘅不織布袋使用量急增，拉上補唔到下，盞嘥氣嘅咋。最離譜係，膠袋稅入咗庫房就如石沉大海，根本唔係用於環保，完全失去徵稅意義。所以話，垃圾徵費唔難，難在政府要有承擔，亦難在要攞出一套完整嘅環保政策。
老實講，對於所謂六成市民支持垃圾徵費，功夫茶實在有啲懷疑，家陣連統計處都可以弄虛作假喇，環保署嘅數字究竟靠唔靠得住，當中有冇水分，真係冇人敢擔保。再講吖，垃圾徵費並唔係靈丹妙藥，就算可以解決問題，都冇可能立即見效，港府聲稱要借鏡台北經驗，其實台北都用咗廿年時間先有今日嘅成績，如果港產官僚以為收錢之後就萬事大吉，唔係太傻，就係太天真。
係人都知，要解決垃圾問題，一定要多管齊下，包括做好源頭回收、興建焚化爐等等。可惜前朝政府敷衍塞責，一拖再拖，喺源頭回收方面一直毫無寸進，而興建焚化爐大計又因為搞唔掂環保團體及地區人士，講咗Ｎ咁多年依然無影無蹤。現屆政府就算有心做嘢，無奈民望低沉，動輒得咎，根本無能為力。最好笑嘅係，喺好多地方都證實可行嘅焚化爐，港產官僚依家連提都唔敢再提。
唉，源頭回收做得唔好，焚化爐又唔敢再提，結果咪淨係識講錢囉，郁吓就向市民荷包開刀，除咗垃圾徵費，電器電子產品回收徵費計劃亦陸續有來吖，問你怕未。港產官僚話呢啲叫做「污染者自付」喎，問題係，如果市民樣樣自付，咁仲要政府嚟做乜？仲養咁多官員做乜？講開又講，其實市民繳交嘅差餉已經包含垃圾費，日後係咪退番畀市民先！
講到底，港府唔肯承擔，一味以「頭痛醫頭、腳痛醫腳」嘅思維搞環保，就算市民願意畀錢，都解決唔到問題嘅咋！