有朋自遠方來，不亦樂乎。多得內地開放個人遊，本港旅遊業近年風生水起，帶旺各行各業，之不過咁，有利就有弊，隨着內地客愈來愈多，唔止與港人頻頻發生摩擦及衝突，加深中港矛盾，更由於旅遊業良莠不齊，泥沙俱下，「零團費」等亂象應運而生，強迫購物醜聞不絕於耳，搞到香港由「旅遊之都」變成「劏客之都」，臭名遠揚。
嗱，鑑於零團費等問題屢禁不止，深圳當局將於下月七日起推出新招，規定旅行社須於出發前四十八小時提交電子團員名單、一團一領隊、每團上限四十人、「整團進、整團出」等，希望藉此遏止拉雜成軍嘅所謂「即興團」喎。
即係咁，有招好過冇招，遲到好過冇到，深圳當局終於肯出手整頓旅遊亂象，總好過乜都唔做。正如香港旅遊業議會話齋，唔少「即興團」屬於零團費甚至負團費，新招有助減少劏客現象。講就係咁講喇，但實際效果係點，仲要拭目以待。
提到即興團，功夫茶有必要稍作解釋。眾所周知，目前只有廣東省及二十八個內地城市實施港澳個人遊，其他省市居民要來香港必須跟團，當中九成係經深圳旅行社喺口岸招徠，雖然淨係提供送客過關服務，但收費一啲都唔平，由數百至逾千元不等，呢啲就係所謂嘅即興團嘞。至於另一種無牌野雞旅行社，就索性以零團費招客，安排旅客直接到深圳口岸集合，然後向口岸有牌旅行社購買《名單表》，蒙混過關。
即興團拉雜成軍，名義上係旅行團，其實係掛羊頭賣狗肉，唔怪得旅客來港後問題多多，爭拗不斷，例如住宿貨不對辦吖、強迫購物吖等等，簡直無日無之。家陣深圳當局終於肯做嘢，香港梗係歡迎啦，不過咁，一個巴掌拍唔響，如果淨係深圳出招，港府乜都唔做，一樣冇用o架。
講到底，旅遊業亂象叢生，欺客醜聞層出不窮，唔可以全部賴晒內地，港府監管不力，同樣難辭其咎。香港話就話有官方嘅旅遊事務署，有半官方嘅旅遊發展局，仲有業界嘅旅遊業議會，三個機構負責監管旅遊業，可惜佢哋各自為政，互相卸責，搞到三個和尚冇水食。係呢，港府早前咪聲稱要成立「旅遊業監管局」，統一規管旅遊業嘅，點解遲遲未有下文呢？唔通又係不提起就不存在？
無論點都好，旅遊業係本港最重要經濟支柱之一，好多行業靠佢食胡，好多打工仔靠佢食飯，如果港府繼續懶懶閒，唔盡快諗辦法加強監管，消除亂象，遲早自毀長城嘅咋！