開講有話，冇咁大個頭，就唔好戴咁大頂帽。前朝貪曾政府好大喜功，聲稱要發展六大優勢產業，結果又點呢？優勢產業就冇嘞，爛攤子就一大堆，都唔知點收科。
嗱，港府早前推出兩幅私家醫院用地招標，準備大搞醫療產業，點知反應冷淡，其中大埔嗰幅只接獲一份標書，連食物及衞生局局長高永文都承認唔排除可能流標。佢仲話，以香港嘅條件，短期內未必能夠發展醫療產業喎。
唉，早知今日，何必當初！本港醫療系統本來已經問題多多，人手唔夠，容量有限，服務質素每況愈下，淨係雙非孕婦已經搞到七國咁亂，公立醫院逼爆，私家醫院搶錢，本地孕婦幾乎無地方生仔，激到要上街抗議，你話喇，咁嘅環境點樣發展醫療產業吖？所以話，貪曾好大喜功，真係累人累物！
講番今次招標，反應冷淡其實一啲都唔出奇。須知近年私家醫院主要靠分娩服務賺錢，家陣雙非孕婦被叫停，等於斷咗條米路，尤其以產科為主嘅醫院更加拍晒烏蠅，睇見醫療產業搞唔成，生仔港好夢成空，邊個仲有興趣投標吖。
高永文話喎，如果流標，會再審視現行計劃。其實計功夫茶話齋，唔使再審視嘞，醫療產業唔只短期內不切實際，長期亦冇可能搞得成，與其繼續蹉跎歲月，添煩添亂，不如早啲宣布收檔，將地皮用嚟起住宅解決房屋問題仲實際喇。呢，港府成日強調房屋政策係施政重中之重，但始終解決唔到地從何來嘅問題，施政報告七拼八湊，亦只可以承諾五年後將公屋供應量增至每年兩萬個單位咁大把，杯水車薪，純粹得啖笑。正所謂，事有輕重緩急，家陣房屋問題迫在眉睫，港府一方面為搵唔到地起樓而頭痛，另一方面就將寶貴嘅地皮留嚟發展所謂醫療產業，唔只本末倒置，直情九唔搭八！
再講喇，醫院嘅職責係救死扶傷，為市民提供醫療服務係港府嘅責任，根本唔應該當作一項產業。大家都知道，內地唔少醫院就係因為唯利是圖而經常見死不救，導致百姓怨聲載道，唔通香港亦想有樣學樣？港府庫房水浸，居然成日想推卸醫療責任，將病人趕去私家醫院，簡直豈有此理。總而言之，香港根本唔應該亦冇條件發展醫療產業，再搞落去盞亂上加亂嘅咋。
講開又講，貪曾留低嘅所謂六大產業多數吹水唔抹嘴，點只醫療產業不切實際，教育產業同樣得啖笑。現屆政府口口聲聲穩中求變，咁就要當機立斷，撥亂反正，唔好再研究復研究喇！