新年新希望，今日係元旦，人人希望來年健健康康，平平安安。不過咁，希望歸希望，保平安最緊要防患於未然，近排禽流感疫情再現，大吉利是講句，如果防疫稍有差池，隨時爆大鑊㗎。
繼本港日前發現禽流雞，當局大開殺戒之後，深圳一名巴士司機日前亦感染禽流感，延至尋日不治。深圳當局仍未能確認感染源頭，僅聲稱懷疑由候鳥引致。
港深一河之隔，交往頻繁，兩地先後出現禽流感個案，威脅日漸逼近，令人不寒而慄，正如港大傳染病學者話齋，事件顯示本港受禽流感影響風險增加。所以，雖然世衞官員強調未發現禽流感病毒已經變種，人傳人機會不大，而本港食衞局亦循例大派定心丸，話本港農場暫時未見有爆發禽流感嘅情況，但仍然無法令人放心。
嗱嗱嗱，打仗最緊要知己知彼，依家連深圳嗰位巴士司機點樣染病仲係一無所知，叫人點放心吖。大家唯一知道嘅係，禽流感死亡率高達六成，而且早期好難發現，等到確認嘅時候可能已經太遲咯。一句講晒，禽流感防範措施宜緊不宜鬆，一旦有甩漏，後果可大可小。
人命關天，萬事小心為上。未發現禽流感變種，唔等於變種威脅唔存在；禽流感人傳人機會低，唔等於可以大安旨意放鬆警惕；暫時未見本地雞場爆發疫情，更唔代表香港可以安枕無憂。
最得人驚嘅係，今次深圳禽流感個案，據講病情好似沙士咁，迅速惡化，而且患者身為巴士司機，每日都要接觸好多乘客，其中包括香港人，萬一病毒散播開來，後果真係不堪設想！
話時話吖，雖然本港早排對感染禽流感嘅死雞基因分析發現，病毒並無變種，但感染源頭到底喺邊，病毒係來自內地雞隻，定係本地雞場，抑或由候鳥引致，當局至今未有結論。最弊嘅係，本港到依家都冇一套切實可行、迅速確認禽流感源頭嘅機制，淨係識得獨沽一味殺雞，講真，就算殺到全港連條雞毛都見唔到，禽流感威脅都唔會消失㗎。
預防勝於治療，防範禽流感離唔開兩招，一係嚴格把關，第一時間確認源頭並且加以堵截；另一招就係提高警覺，全民皆兵。曾經參與○三年沙士抗疫嘅中文大學校長沈祖堯話，近年港人對傳染病嘅警覺性下降咗，呢番話除咗提醒市民唔好忘記當年沙士慘痛教訓，更暗示當局冇做好份工，防疫懶懶閒。
北大人早排告誡煲呔曾要「恪盡職守」，站好最後一班崗。嗱，如果一味等收工，翹埋雙手吊吊揈，一旦沙士悲劇重演，因住臨尾香吖！