孔聖話「吾未見好德如好色者」，這話大有道理，睇電視看報紙，幾乎日日見到「為女死」的爭風呷醋「新聞」，有幾何見到有人為不平事仗義執言，以身犯險？如今有喇！香港有個仗義阿伯徐威，不齒一大班販管隊如狼似虎圍捕一個患白內障、跪地求饒的老婆婆。
香港其實係一個病態社會，男人的陽剛氣逐步褪色，官場少真話，即使不是如清朝的三朝元老曹振鏞所說的「做官要多磕頭，少說話」；可是，即使說話也是「人肉錄音機」，顧左右而言他，藏頭露尾，一如唐朝蘇味道所說的，做官說話要「模棱」。林公公深明此道，佢評副局政助一句帶過「整體上符合要求」。你睇，做高官而能到處留下活扣，見機行事，看風轉舵，叻仔！抵佢月入三十萬元，一日一萬元算最低工資。
老朽指「香港其實係一個病態社會」確有感而發，乃好多嘢顛倒晒！小販管理隊捉老弱殘障的小販，則「風發雲逝，有不可一世之概」；反之，最近尖沙咀諾士佛臺爭女碰撞毆鬥，釀一死一危事件，看電視畫面，但見男子漢面對混亂群毆，血腥衝突場面，完全控制唔到。當時，差人在場，肇事青年仍追打揚威，警棍都冇攞出嚟，手銬又唔用，胡椒噴霧又收埋。大佬啊，死人噃！學吓澳門「抽水哥」向天開一槍都冇人話你錯喇！
唔知係唔係名媛一掌摑到男子漢抬不起頭做人，不能「立誓披荊斬棘，心裏更願永不折腰」？老朽但願警隊一哥正視差人士氣，否則，小市民死得！如果官場冇像樣的高官，警局冇像樣的男子漢，正義之士只在市井，香港玩完！