喺童話故事入面，木偶講大話會鼻哥長，咁喺現實世界裏面，企業講大話又有乜嘢後果呢？唔使講，梗係手尾長喇。高鐵工程嚴重延誤，黑幕重重，港鐵為咗掩飾醜聞，不惜隱瞞真相，用一個大話冚另一個大話，用一個謊言掩飾另一個謊言，結果造成連鎖式政治災難，醜聞像鐵軌一樣長。
高鐵工程嚴重延誤，港鐵管理層最初賴天賴地，又話黑雨浸壞鑽挖機，又話地質太硬太複雜，接住又砌詞歸咎工人不足，總之就係大話連篇，藉口多多，結果咪自取其辱囉。港鐵尋日又被人揭發不盡不實，明明舊年初已得知西九龍總站地底嘅岩層會影響完工日期，但舊年十月仍然堅稱可以如期竣工，擺明有意誤導公眾，隱瞞實情。仲有吖，根據總站地質勘探報告，港鐵原來早喺一○年已經知道地底有高硬度岩石，而近日居然宣稱「地底石層未能預料」，你話係咪講大話唔眨眼吖。
港鐵似撒謊專家多過鐵路專家，叫市民仲點信佢哋呀？最好笑嘅係，高鐵爆出連串醜聞後，港鐵煞有介事成立獨立委員會調查，殊不知所謂嘅獨立調查委員會根本一啲都唔獨立，成員清一色係港鐵非執行董事，咁即係自己人查自己人嘅啫。港鐵大話連篇本來已經誠信破產，家陣委任一班中立性成疑嘅人查番自己，關起門來一家親，會唔會又係大話冚大話嘅公關把戲呢？講句唔好聽，其身不正，何以正人，調查委員會備受質疑，調查報告嘅公信力高極都有限喇。
更令市民唔服嘅係，調查委員會查高鐵醜聞，邊個嚟查失職官僚呢？冇錯，高鐵搞到一鑊粥，港鐵管理層固然要問責，但係港府一樣難辭其咎。當局身為政策監管者，又係港鐵大股東，居然被港鐵一次又一次瞞騙，一次又一次玩弄，如果唔係腦殘，就肯定係同港鐵扯貓尾喇。難為運房局局長張炳良尋日仲若無其事咁款，話已經責成路政署署長提交獨立評估報告喎，簡直就係自欺欺人。
講開又講，港府疏於監管，港鐵千瘡百孔，醜聞百出嘅何止高鐵。呢，港鐵列車事故頻生，早前「兩日六癱」，玩殘乘客，本來已經搞到怒火處處，怨聲載道，諗唔到港鐵列車延誤不特止，延誤之後仲要瞞得就瞞，上周一列輕鐵駛入河田站月台時懷疑未能停在正確位置，服務一度受阻超過十分鐘，但居然未有依規定向運輸署通報。
港鐵醜聞不絕，唔係冇原因嘅。本報日前獨家踢爆港鐵青衣車務控制中心金玉其外，敗絮其中，顯示屏美輪美奐，而監控系統嘅電腦硬件居然係陳年舊貨色，隨時因組件老化及不兼容而發生故障，甚至連列車相撞都懵然不知。講真，鐵路系統好似人體一樣，個腦壞咗，手手腳腳梗係唔聽話喇，計功夫茶話齋，如果要港鐵以後聽聽話話，運輸官僚先醫好自己個腦殘症先喇！