古人話，君子不立危牆下。呢句說話有兩層意思，一係防患於未然，預先察覺有潛在危險，就要採取防護措施，二係當發覺身處險境時，就要及時離開。之不過咁，如果現實中處處都係危牆，度度都係險境，真係避無可避。
就好似香港咁吖，商舖林立，總共有十二萬個招牌，而且大部分違例，唔少仲係危危乎添。由於過去多次發生塌招牌壓傷人甚至壓死人意外，港府舊年九月推出「違例招牌檢核計劃」，鼓勵招牌擁有人自願申報面積唔超過二十平方米嘅伸出式、或面積小於四十平方米嘅靠牆式招牌，經屋宇署認收後可暫時保留，其後每五年重新核證。計劃初衷無疑係好嘅，可惜港產官僚做嘢求求其其，結果咪荒腔走板，形同虛設囉。
嗱，自願申報實行咗七個幾月，屋宇署只收到二十三份申請，佔全港招牌零點零二個巴仙咁大把，而且只有四份經認收可保留使用，其餘十九份因為資料不完整、不正確等原因而無法處理，實際成效接近零。
點解自願申報招牌計劃搞成咁？有食肆東主吐苦水，話自願申報招牌要自掏腰包搵專業人士檢驗，萬一發生意外，仲要承擔法律責任，邊有人自投羅網吖？區議員亦直斥自願申報制度漏洞百出，既無清拆時限，又無阻嚇力，加上屋宇署處理違規招牌一向歎慢板，令問題繼續存在。
所以話，港產官僚眼高手低，志大才疏，計劃唔爛尾收場至奇。計功夫茶話齋，危險招牌吊吊揈，當局與其繼續一廂情願叫人哋自願申報，不如主動出擊，加強執法。俗語話，有錢能使鬼推磨，港府乜都缺，就係唔缺錢，咪請人先檢驗同盡快清拆囉，然後至同招牌擁有人收番錢，使乜樣樣嘢都推畀市民吖？
講開清拆違例招牌，不得不提前特首貪曾爵士。○九年金融海嘯為禍，貪曾煞有介事展開清拆招牌大行動，計劃每年拆除一千七百個舊招牌，仲吹到天花亂墜，話拆招牌不僅改善市容，保障安全，仲可以對抗經濟逆境，創造就業，轉危為機添。結果計劃虎頭蛇尾，前年只拆一千三百個，舊年進一步減至一千一百幾個，而屋署發出嘅清拆令，更由○九年嘅五千五百幾張減至舊年二百五十張。
事實證明，貪曾禍港，遺患無窮，香港廉政、法治全面倒退唔使講，依家更變成危險之城，市民連出入平安都成奢望。點講都好喇，唔該現屆政府快快撥亂反正，如果連取締違例招牌咁簡單嘅嘢都做唔到，不如索性拆咗「穩中求變」個招牌啦。