香港話就話係法治之區，其實只係山寨貨色嘅咋。嗱，好似食飯咁簡單嘅事吖，因為當局有法不依，執法不嚴，食客隨時幫襯咗違規食肆都唔知，萬一發生意外，完全冇保障。
可能有人唔知，食肆牌照其實分好幾種，當中有一種叫「工廠食堂牌照」，係上世紀七十年代工業蓬勃嘅產物，用來招待廠內員工，食堂牌照費用較普通食肆平好多，限制亦相應較多，例如不能接待街客，不能展示招牌，同埋入口不能面向大街等。工廠食堂要轉為普通食肆都唔係話唔得嘅，但要向政府補交地價先，否則就係違反地契，隨時要罰款兼坐監o架。
可惜法例係一回事，現實係另一回事。好似長沙灣有間工廠食堂吖，近排變身美食廣場，中西日韓乜菜式都有，而且中門大開，歡迎八方賓客，每逢午飯時間例必座無虛席。呢個美食廣場話就話「只招待本大廈員工」，其實掛羊頭賣狗肉，本報記者以街客身份入內光顧，唔止冇職員查問，場內仲設有四部自助購票機，任人幫襯。更加得人驚嘅係，上址竟然連工廠食堂牌照都冇，完全係無牌經營。消防設施亦係千瘡百孔，唔止逃生門被鎖上，場內滅火筒亦已過期兩年，萬一發生火警，後果不堪設想。另一間位於觀塘嘅工廠食堂亦不遑多讓，同樣變身美食廣場，進駐七家不同食店，違規招呼街客，可見呢類違規食堂幾咁普遍。
光顧呢類食堂有乜嘢後果呢？保險業人士係咁講嘅，工廠食堂接待街客，已等同投保失實，保險公司有權唔賠，食客毫無保障。有地產代理仲話，工廠食堂違規營業，等同變相逃避繳交補地價差額，就以上述兩間美食廣場為例吖，因為工廠大廈租金較平，如果按市值租金計算，每月就分別慳咗廿七萬及十五萬元嘞，變相令政府少收豁免限制費用五百萬元，你話係咪離晒大譜吖。
工廠食堂違規經營搶街客，唔通無王管嘅咩？理論上有，食環署、消防處及地政總署有共同監管之責，實際上官老爺有法不依，有法等於無法，最搞笑嘅係，連食堂負責人都承認違規招待街客，但本報向食環署查詢時，署方竟然話近日有巡查但冇發現喎，官老爺有眼無珠，詐傻扮懵，唔怪得違規工廠美食廣場愈開愈多啦！
話時話，無規無矩嘅何止工廠食堂吖，私人會所違規經營麻雀房、中式食肆等非體育設施，同樣係豬籠入水，有啲年收入過千萬元，變相攞公帑自肥。咁搞法，香港容乜易變成九反之地吖！