風災善後都唔掂 市民納稅真冤枉

香港人周末最興歎茶共敍天倫,不過唔少市民尋日嘅「假期節目」相當特別,佢哋全家總動員去風災現場幫手清理垃圾,就算搞到一褲係泥都毫無怨言,所以話「天災無情,人間有情;官僚冷漠,市民熱血」,幾時都冇講錯!

好似重災區杏花邨咁吖,直到依家都仲係滿目瘡痍,街上污泥濕完又乾乾完再濕,臭味傳到幾層樓高,十幾名家住九龍及新界嘅義工,因為唔忍心清潔工人做到氣咳,尋日一大清早專程過嚟幫手。佢哋唔止熱血,仲非常專業,連水壓槍都配備埋,明顯有備而來。石澳嘅情況亦唔輸蝕,義工隊伍達二百人之多,短短一日就收集到幾百袋垃圾,最抵讚係分工精細,有人負責鋸斷樹枝,有人負責垃圾分類,有人幫手清走藏喺沙粒內嘅發泡膠粒,嗰班食嘢唔做嘢、反賴市民「添煩添亂」嘅廢官,今次可以收得皮喇。

唔講廢官猶自可,講起當堂把幾火。面對風災善後,高官一個二個坐而論道,口水多過浪花,早排被列為「失蹤人口」、幾乎搞到市民要掟西瓜刮佢嘅運房局局長光頭陳,居然好意思話自己「夙夜不眠」。大家唔知佢老哥有覺唔瞓,究竟係去咗打機吖定抑或去咗煲劇,大家淨係知救災指揮現場佢統統no show,反而陪老細北上視察高鐵設施就鬼咁精神,一副你急佢唔急嘅架勢,直頭為毛伯伯「不管風吹浪打,勝似閒庭信步」嘅名句注入新解。

即係咁,市民自告奮勇協助風災善後,精神固然可嘉,之但係班所謂公僕「為官避事」,市民交咁多稅養班廢柴,就認真冤哉枉也。而更重要嘅仲係,山竹離開近一星期,港九新界到依家仲係滿布塌樹,有樹藝公司反映接柯打接到手軟,部分緊急個案要排到十一月,單靠民眾單打獨鬥,始終唔係辦法。大家落街打個轉就知,塌樹垃圾塞滿行人路,啲阿婆細路要行出馬路,一個唔小心撼親,後果可大可小。特別係夜晚,大家千祈唔好着黑色衫行街,如果唔係烏燈黑火,分分鐘畀雜物樹幹戟到,簡直係危機四伏!

真係諗極唔明,既然食環同外判工搞唔掂,點解唔call紀律部隊幫手?正所謂養兵千日,用在一時,回歸前,警察、輔警、民安隊都會幫手搬走塌樹雜物,點解回歸後反而冇影?咪話功夫茶唔提醒,冇額外人力清理路面雜物,隨時要清多一個月,都係嗰句,如果市民下下要自己郁手先清理到,咁點解仲要交稅先?

特衰政府災後重建不力,唔單止都市炸彈處處,全港多個泳灘到依家仲係紅旗高掛,市民連中秋佳節賞月燒烤嘅興致都被剝奪,唔通真係要搞到官逼民反,喺月餅傳紙仔搞革命至安樂!