晚清有本小說叫《二十年目睹之怪現狀》，計功夫茶話齋，香港人都可以寫番本《回歸廿一年目睹之怪現狀》，其中一章一定係「反中亂港好得戚，愛國愛港慘戚戚」，淨係睇吓律政司點樣庇奸護淫，點樣打壓正義傳媒，就知咩料喇。
好似壹淫媒漢奸黎恐嚇東方報業記者案吖，有圖有片鐵證如山，如果香港仲有法治，一早拉人封艇喇，但事實係事過一年呢條契弟依然逍遙法外。最離譜係，東方九度去信律政司質詢檢控進度，包括受害記者親自致函，律政司一樣話之你，唔係講虛話、放煙幕，就係睬你都傻。有名你叫「玉皇大帝第九個孫」，律政司庇奸護淫出晒面，要幾肉酸有幾肉酸，唔到你唔服。
喂，《罪行受害者約章》係律政司自己編製嘅，當中白紙黑字規定十四個工作天內回覆受害者查詢，家陣公然違反服務承諾，仲成世界嘅？冇錯，東方發出第九封信後，因為將副本再次抄送特首辦兼畀埋申訴專員公署，終於逼到律政司開綠燈，指示警方向漢奸黎錄口供，但此舉絕對唔代表律政司真正將漢奸黎落鑊，更唔代表律政司冇違反服務承諾。所以話，申訴專員公署必須嚴正調查律政司瀆職，確保第四權不受打壓，還受害記者公道吖。
睇吓申訴署嘅網頁點講喇，專員有權調查政府部門行為失當，包括濫用職權、延誤或沒有採取行動、厚此薄彼及處事不公、沒有回應或答覆投訴及查詢、選擇性執法、職員態度欠佳等等。好明顯喇，所有天條律政司都衰到應一應，完全冇轉圜餘地，正如關注組織話齋，如果連申訴署都違反自己嘅服務承諾，唔秉公處理，咁就真係荒天下之大謬嘞。
咁又係呀，齋講「沒有回應或答覆投訴及查詢」呢一宗罪咋，東方發出嘅第四至第七封信，全部泥牛入海，律政司詐傻扮懵不聞不問，係咪行為失當，好清楚喇，如果講埋「厚此薄彼及處事不公」、「選擇性執法」等罪名，律政司更係水洗唔清。大家有眼見，但凡涉及漢奸黎等反中港亂集團嘅案件，律政司一律高高舉起、輕輕放下，好似政治黑金案，唔止收錢嘅長毛等政客冇事，律政司仲講明放生金主漢奸黎添，簡直無法無天，反觀七警案就快判重判，連執紙皮嘅婆婆都唔放過，呢啲唔係厚此薄彼、選擇性執法係乜呀？
點都好，申訴署作為監督政府部門嘅機構，過去嘅表現備受各方肯定，今次亦都要一查到底，嚴肅問責，畀東方、受害記者同埋所有支持新聞自由嘅市民一個交代，千祈咪官官相護，令人失望吖。