做人不可以沒想法，不過只得想法而冇方法去執行，一樣聽失敗嘅咋。好似港府推出「四電一腦」計劃咁吖，概念係唔錯，只可惜要配套冇配套，要監管冇監管，搞到環保不成變擾民，問你點頂！
呢，廢電器電子產品生產者責任制實施咗一個月，「效果」有目共睹，就係劣評如潮，民怨四起。所謂三日內上門回收舊電器，講就好聽，實際上要九日至做到，回收商仲涉嫌更改單據日期，出茅招嚟滿足三天內除舊嘅承諾；有銷售商就收咗顧客循環再造徵費，卻冇履行法定嘅除舊服務，仲叫消費者自行聯絡回收商；有啲就索性用減價、折扣優惠引誘消費者選擇自行處理舊電器，總之就各師各法，當環保署係無牙老虎，視法例如無物。
新制亂象叢生，其實一啲都唔出奇。查實計劃推出嗰陣已經引嚟種種質疑，環保署當時拍晒心口保證，話會透過巡查同執法，確保電器銷售商同埋回收商遵守服務承諾；就算唔少市民話回收商搞唔掂，環境局局長光頭星都一味死撐得得得，仲夠膽死話可以做到同日送舊迎新添。如今事實擺在眼前，有小型公司聯絡回收商收電器，竟然被告知要儲夠四件舊電器至會嚟收，又一次證明「港官靠得住，豬乸會上樹」。
喂，小市民屋企頂盡幾百呎，好話唔好聽轉個身都難，唔似得高官大宅或官邸閒閒哋幾千呎地方，仲有儲物室，可以等回收商九日後嚟除舊。小公司一樣咁慘，有幾多本錢可以一次過掟晒四件舊電器吖，咁嘅無理要求，即係叫人哋自己處理啫。
不過話又講番轉頭，回收商無法滿足三日內除舊嘅要求，原因未必係佢哋特別懶，而可能係根本做唔切。你知啦，全港七百幾萬人口，每日要更換嘅電器不知凡幾，偏偏港府淨係批出三張回收商牌照咁大把，仲要得其中一間提供上門回收服務，千手觀音都唔掂喇。官老爺無視現行配套應付唔到需要，已經抵鬧，更加抵閙嘅係處理另外嗰十一間回收商牌照申請大歎慢板，唔單止玩殘市民，直頭製造不公平競爭，兼夾有助長市場壟斷之嫌呀！
冇錯，環保係世界潮流，市民都樂觀其成，問題係，港產官僚人頭豬腦，最叻閉門造車，政策未考慮周全、未有配套之時就急急腳出籠，卒之效果適得其反，唔理係膠袋徵稅定垃圾徵費，最終唔係淪為搵銀項目，就係擾民之舉，吹脹！
所以話啫，港產官僚嘅腦筋思維仲停留喺咸豐年，比啲舊電器更加陳舊，唔先回收呢班廢柴官僚，環保實冇可能，香港實冇運行。