冷知識時間︰點解比薩斜塔會傾斜？答案係地基不均勻沉降同埋土層鬆軟所致。講到沉降，我哋嘅港鐵沙中線就厲害得多咯，唔單止程度深，而且範圍廣，仲要沉降問題不斷惡化。只要當局識宣傳，「沙中斜鐵」、「香江斜樓」絕對有機會壞事變喜事，進身最新熱門旅遊景點，實行搶晒比薩斜塔啲客！
呢，港鐵提交畀立法會嘅文件顯示，沙中線全線約一千五百個沉降監測點當中，有約一百三十個超出量度時嘅標準，其中重災區嘅土瓜灣站，有十四棟樓宇沉降超標，最嚴重嘅超標近一厘米，比標準高三成之多；會展站附近一個商場亦錄得十四處沉降超標，最嚴重處同樣達三成，會展新翼牆身甚至出現十米長裂紋；其他錄得沉降嘅地區包括沙田顯徑、鑽石山以及紅磡等，涵蓋設施則包括水管、煤氣管、污水渠以至行人路，都咪話唔得人驚。
港鐵對外放風，拍晒心口保證錄得沉降超標樓宇嘅傾斜度仍處於安全水平，冇結構安全危險咁話，真係信佢一成，雙目失明。好似錄得最多監測點沉降超標嘅會展站咁吖，直頭要停工，你知喇，港鐵同洋承建商最叻就係臭屎密冚，大事化小，連佢哋都覺得有必要停工，可想而知問題有幾嚴重。
咁都未算吖，聽講過去沙中線工程錄得沉降超標時，港鐵會向屋宇署申請放寬標準，期間工程仍然如常進行，有關方面承認做法唔理想，話今後會先停工，評估實際情況並確定安全後，再向屋宇署申請放寬標準喎。唔係啩，「紀錄」就話用嚟「打破」啫，「標準」都可以立亂「放寬」，所謂標準咪即係冇標準？咁之前過咗骨嘅工程，豈不是同計時炸彈冇咩分別？官老爺係又開綠燈，唔係又開綠燈，點止靠害咁簡單，直頭草菅人命！
唔講猶自可，一講把幾火。成條沙中線大拿拿耗費近千億元，結果三日唔埋兩日爆大鑊，唔係沉降就係車站擅改圖則、剪短鋼筋，再唔係就隧道滲水，以致被譏為「豆腐沙中線」。負責監管嘅運房局局長光頭陳，居然夠膽死話睇報道至知，事後求其隊幾個港鐵高層出嚟祭旗，佢老哥就官照做、糧照(豆)。最離譜嘅係港府懼洋症發作，明明涉事洋承辦商撞板多過食飯，都硬係要送錢畀佢使，再咁落去，公帑倒落鹹水海事小，車毀人亡嗰度大鑊呀！
一節見則百節知。沙中線全線沉降，何嘗唔係香港全面沉淪嘅縮影。如果話馬爾代夫因為氣候暖化，海水上升而陸沉，島民淪為「氣候難民」，咁官老爺顢頇無能，倒行逆施，七百萬香港人都可以話係名副其實嘅「劣政難民」咯。