深圳八十年代有句口號係咁講嘅：「時間就是金錢，效率就是生命。」三十幾年後嘅今日，深圳已經貴為「中國硅谷」，反觀一向以效率見稱嘅香港每況愈下，特衰政府做嘢拖拉兼冇章法，連搞個邊境購物城都唔掂，真係唔到你唔服。
城規會尋日審批新田購物城續租三年嘅申請，當初有份促成計劃嘅立法會議員猛落嘴頭，幫呢個十室九空嘅「死城」講好話，強調商舖出租率奇低係因為年頭至啟用，租期半年太短，若果批准玩多三年就唔同講法咁話。咪話功夫茶潑冷水，喺港府胡亂規劃下，購物城先天不足，後天失調，租期愈長，商戶盞蝕得愈甘嘅咋！
坦白講，前朝政府五年前提議搞邊境購物城嗰陣時，諗住分流市區接待內地旅客嘅壓力，緩解北區居民不滿情緒之餘，塞住光復行動嗰班搞事者之口，原意唔係話唔好，可惜政府唔識打鐵趁熱，淨係研究係咪用公帑收地都已經嘥咗唔少時間，卒之拖到前年第三季落實興建，直至今年初至正式面世，議而不決，決而不行，乜都攤凍晒喇。
冇錯，近年中港矛盾不斷升溫，唔少內地旅客買咗香港怕，「一簽多行」變「一周一行」之下，內地旅客來港人數少咗成大截，購物城未見官先打八十大板，想有運行都幾難，但即使撇開呢樣唔講，購物城興建之初，城規會已經畀居民鬧爆冇做好交通配套規劃，結果正因為交通太隔涉，想搵隻人影都難。鬼咩，購物城山長水又遠，旅客要喺落馬洲過關搭皇巴士至去得到，嗰度又乜嘢景點都冇，旅客拖住大篋細篋，你估真係貪過癮咩！
所以話，購物城交通配套天殘地缺，就算有客源都無福消受。好似今年五一假期咁，全港各區人頭湧湧，唯獨購物城水盡鵝飛，斯人獨憔悴。查實莫講話內地旅客，你問十個本地人，九個噏唔出購物城點去，唔拍烏蠅至奇。
一節見則百節知，特衰政府掂親邊瓣衰邊瓣，邊境購物城搞到一鑊泡，固然凸顯港產廢官懶政怠政嘅劣根性，其他好似美食車以至行人專用區，無一唔係爛尾收場，至於政府近日硬推「四電一腦」計劃，就更加係要監管冇監管，要配套冇配套，明明全港得一間持牌回收商提供上門服務都夾硬拍板，結果咪搞到民怨載道，好事變壞事囉。
講嚟講去，一日最衰都係港產官僚眼高手低，化神奇為腐朽，邊境購物城今時今日已經淪為雞肋，官老爺若然仲有心搞番好個檔攤，一定要大動手術，從執番好個配套做起，咪以為為商戶續租就當交咗功課呀！