大學迎新活春宮 一代新淫勝舊淫

大學開學日又到，有人喺社交網站翻科大舊帳，上載多張早前搞迎新營嘅照片，只見三名女生尷尷尬尬咁坐喺男生大髀上玩「壓爆波」，氣球爆後女生直接坐喺男生大髀上；城大一個學會嘅迎新活動，就畀人投訴要求玩輸嘅女生將氣球塞入件衫，更有參與嘅師兄突然除衫裸露上身，真係睇見都眼冤。

所以話大學生「新淫勝舊淫」啫。以前O camp頂多嗌吓鹹濕口號，玩吓happy corner，屬於「光說不練」嘅意淫性質，近年迎新活動愈來愈「真幹」加「實幹」，曾有學生喺渡輪上演舔女同學大髀活春宮，加埋科大同城大呢兩單，再咁落去，點知下次會唔會乾柴烈火，真箇銷魂o架。

難為有人仲以「你情我願」同班「大學雞」開脫。新生初嚟埗到，對住成班老鬼，壓力下邊個夠膽say no？再講吖，如果「你情我願」可以做擋箭牌，香港就唔會有「土地問題」，之前喺校園門口打野戰嘅學生亦唔使惹官非。仲有呀，法律界人士提醒如果身體觸碰程度過火，分分鐘構成性騷擾甚至非禮，唔係講玩o架！

點解大學迎新文化變質變味？睇過粵語殘片嘅都知「媳婦熬成婆」嘅道理，新生畀舊生喺O camp淫辱，就好似新抱畀家婆恰一樣，等到自己升呢，必定加倍奉還，難怪O camp「你淫我仲淫，嚟個十八禁」。

咁當然，校方姑息縱容亦都難辭其咎。好似城大咁，佢哋話迎新活動係由學生會及屬會自行為新生舉辦，目的係幫助佢哋適應大學生活喎。唔譴責都已經夠離譜，「自行舉辦」直頭有卸膊之嫌；至於講到「適應大學生活」就仲好笑，乜城大男生興打大赤肋上堂嘅咩？定抑或迎新活動係幫助新生適應大學「性」生活？

一節知則百節見，近年大學校長好似買咗班學生怕咁，連講句重話都唔敢，講得好聽啲係沽名釣譽，講得難聽啲直頭係鄉愿、誤人子弟，O camp玩鹹濕，佢哋唔出聲；學生喺畢業禮舉黃傘做政治騷，佢哋唔出聲；學生參與違法佔中，有校長居然大讚「為天地立心，為生民立命」，加上「爛果報」長年荼毒，政棍教授「違法達義」妖言惑眾，有乜法子唔出事。

青年係一個地方嘅未來，大學雞是非不分，目中無人，香港未來係點，不問可知！