游水池含尿極高 康文署充斥廢柴

天氣炎熱,碧池暢泳不嬲係市民健身休閒嘅好去處。不過咁,拜康文署管理無能所賜,家陣唔少公眾泳池水質污糟,淪為尿尿池甚至便便池,諗一諗都作嘔呀!

呢,九龍公園泳池被驗出含尿情況嚴重,嬉水池同主池分別被驗出有逾四百及近三百人次喺池水中小便,與其話係游水,不如話係游尿,簡直離晒大譜。有政黨就訪問咗二百幾位泳客,超過六成人唔滿意泳池清潔狀況,近八成人仲話池水過濾做得唔掂。仲有,救生員經常唔夠人當值,搞到泳池需局部關閉,泳客逼埋晒喺一兩個池度,人頭湧湧,只能浸水,冇得游水;浴室花灑頭同儲物櫃壞咗又冇人理。泳池硬件同軟件冇瓣掂嘅,「樂游游」就冇嘞,「恨悠悠」就差唔多。

話時話,九龍公園泳池作為九龍區唯一合資格舉行大型或國際泳賽嘅場地,竟然水質污糟邋遢、設備甩皮甩骨,認真失禮死人。康文署連管理「龍頭」泳池都咁求其,其他泳池情況有幾惡劣仲使問咩。講真,尿尿池都唔算太誇張,前幾日有港媽鬧爆將軍澳泳池,竟然有三個泳池都有「黃金」漂浮喺水面,嚇到以後唔敢再去游水。

講起就羞家,香港人成日笑話內地同胞不文明、冇修養,有人仲鬧港獨添,其實睇吓香港公眾泳池淪為尿便池,就證明香港人的而且確係中華民族嘅一部分,事關內地人有嘅毛病,香港人一樣有,大家唔好五十步笑一百步。當然啦,部分泳客缺乏公德心抵鬧,康文署更加難辭其咎,唔講便便池呢一筆,淨係投放消毒嘅氯氣都馬馬虎虎,唔係低於標準,就係超標。係人都知,氯含量不足無法做到消毒效果,導致細菌孳生,危害泳客健康;相反,含量太高就會對皮膚同呼吸系統有不良影響,一樣係害人不淺。康文署對池水嘅清潔是是但但,連加氯氣咁簡單嘅嘢都做唔好,話佢哋唔係廢柴都唔得喇。

康文署管泳池唔掂,管救生員一樣冇符。熱衷搞搞震嘅郭紹傑曾以「跌斷鎖骨」為由請病假,轉頭就喺佔領行動充當漢奸黎私人保鏢,仲同人打交添,點睇都唔似有病。睇到喇,救生員野貓式罷工又得,返工瞌眼瞓又得,詐病請假都得,康文署闊佬懶理,公眾泳池污濁不堪就係咁解。

講到呢度,可能好多人同功夫茶一樣思疑,點解堂堂康文署竟然連泳池都管唔掂?不排除一個可能性,就係專登將泳池管得一塌糊塗,市民怕污糟唔嚟游水咯喎,官老爺唔止做少好多嘢,仲連救生員人手不足嘅大難題都解決埋,吹脹!