添馬艦政府總部嘅設計概念係「門常開」，寓意打開大門，廣納民意，本來係幾有創意嘅。可惜吖，創意歸創意，現實歸現實，今日香港七國咁亂，港府動輒得咎，幾乎朝不保夕咁滯，門常開好快就會變成門常關咯。
係咁嘅，當局宣布政府總部東翼空地尋日起至八月底關閉，準備進行加設圍欄工程，之後長期於晚上十一時至清晨六時封閉。行政署發言人聲稱，加設圍欄主要係配合改善大樓整體保安嘅需要，圍欄只設於東翼前地嘅周邊，對遊行集會影響輕微喎。
即係咁，近年示威遊行愈來愈多，而且愈來愈激，好似立法會大樓咁吖，早前受到反對新界東北發展計劃嘅示威人士衝擊，搞到滿目瘡痍，一片狼藉。政府總部東翼作為最熱門嘅集會地點之一，亦經常有示威人士聚集，當局為免衝擊立法會場面重演，加強保安措施本來係無可厚非嘅，尤其係政改爭拗愈演愈烈，佔領中環蓄勢待發，政府總部隨時成為衝擊目標，當局唔驚就假。
不過咁，你驚係你嘅事，反對派一於少理。對於政府玩自閉，有人批評本末倒置，愈來愈封閉；有立法會議員甚至表示遺憾及憤怒，不排除提出司法覆核添。所以話，弱勢政府百事哀，門常開唔掂，門常關亦唔得，進退失據，都唔知好笑定好嬲。
其實正如古人話齋，與其揚湯止沸，不如釜底抽薪。香港之所以示威遊行無日無之，政府總部之所以經常受到圍堵，雖然唔排除少數人故意搞搞震，但歸根究柢都係因為港府管治無能，施政混亂。試諗吓，如果香港政通人和，市民安居樂業，點會有人搞搞震吖？又點會有人衝擊門常開吖？港產官僚無能，自己唔去查找不足，紓解民怨，反而加設圍欄自絕於民，簡直係倒行逆施。呢，港大最新民意調查顯示，本月中嘅民情指數只有六十五點九，較上月底急跌八點一，係去年底以來第二次錄得低於七十嘅水平，被視為二十多年來最差嘅百分比，主要反映市民對政府管治嘅評價轉差。
群眾眼睛雪亮，呢項民調已足以顯示民心向背。今時今日民不聊生，民怨沸騰，加上社會泛政治化，就算當局點樣加強保安措施，就算政府總部固若金湯，都係不堪一擊嘅咋。再講喇，日防夜防，家賊難防，當局可以防止示威群眾衝擊，但防止唔到內部有人搞鬼，結果咪又係嘥氣。
正所謂，水能載舟，亦能覆舟，民意係施政嘅基礎，港產官僚唔敢面對群眾，一味做縮頭烏龜，下場只有一個，就係自取其辱，唔衰攞嚟衰！