網絡有句說話係咁嘅：「唔好同我講工作理想，我嘅理想係唔工作。」簡直講出特衰政府高官嘅心聲。事關佢哋連去立法會開會都懶，唔少人嘅出席率低過五成，律政司司長鄭若驊更以兩成半出席率淪為包尾大幡，被批評為懶到出汁，真係一啲都冇冤枉㗎。
嗱，本報統計新一屆政府喺一七/一八年度，各立法會事務委員會嘅官員出席率，結果發現佢哋懶到得人驚。運房局局長陳帆出席率不足四成、食衞局局長陳肇始仲三成都冇添，但點都唔及鄭若驊，八次司法及法律事務委員會會議只係出席兩次咁大把，仲衰過前任袁國強多多聲。難為律政司仲死撐，話鄭若驊缺席嘅六次會議全部由相關律政專員或首長級人員出席，仲話咁樣係一貫做法，擺明將怠工懶政合理化，呢啲咪叫官字兩個口囉。
係人都知，港府高官領嘅係全球數一數二嘅高人工，點知高薪養廢，連開會都懶，有冇再離譜啲吖。正如議員話齋，港府推行高官問責制，官員就有責任出席立法會解釋政策同回應質詢，一開會就玩失蹤，求其派個副手嚟充撐場面，即係唔敢面對民意，問責制蕩然無存。行政立法無法溝通咯喎，唔怪得港府施政空轉，由政治到民生再到經濟都一塌糊塗喇。
諗落都冇乜出奇嘅，鄭若驊甫上任就爆出大宅僭建醜聞，身有屎咯喎，其身不正咯喎，梗係避得就避，閃得就閃，冇面見人喇。之但係佢阿姐採取「鴕鳥政策」，高薪厚祿就袋袋平安，對唔對得住納稅人先？有關注組織就講得啱嘞，立法會嘅事務委員會每月只係開會一至兩次，每次頂多兩粒鐘，鄭若驊咁都要射波，懶到出汁都不足以形容，納稅人簡直冤哉枉也。
正所謂，上樑不正下樑歪，鄭若驊蛇得就蛇，懶得就懶，下屬點會唔有樣學樣。最近一宗財務詐騙案，律政司畀法官狠狠訓斥態度懶散，冇畀心機睇文件，應告唔告，唔應告走去告，令一眾被告全部甩難，咪就係司法亂象嘅冰山一角囉。當然喇，最肉酸都係鄭若驊一上任就放生漢奸黎單政治黑金案，完全視法治如無物，有咁大把司法保護傘撐腰，唔怪得漢奸黎指揮策劃佔中冇事，連證據確鑿嘅恐嚇東方記者案都可以逍遙法外。如果話當中唔存在政治交易，三歲細路都唔信。
古人話，紀綱一廢，何事不生。法治係香港賴以繁榮嘅最重要基石，律政司咁重要嘅部門，居然由一個醜聞纏身、懶到出汁、黑白顛倒嘅司長領導，香港法治沉淪，亂象不絕，家陣知點解喇。