反中亂港一條龍 愛國愛港一條蟲

以史為鑑,可知興替。當年魯迅寫《狂人日記》,話睇遍中國史書,字裏行間歪歪斜斜寫住封建禮教「吃人」兩粒字;功夫茶都鍾意讀歷史,從大中華上下五千年到香港回歸短短廿一年,就總結出「反中亂港金腰帶,愛國愛港冇屍骸」呢個規律,唔信嘅請聽在下娓娓道來。

忠義之士 粉身碎骨

講番中國史先喇,從來都係奸人當道,忠臣遭殃。商紂王寵信妲己,重用奸臣,忠義之士唔係被腰斬,就係被炮烙,其中又以被剖腹挖心而死嘅比干最出名;伍子胥為吳國稱霸立下汗馬功勞,點知竟被吳王夫差賜劍自盡;屈原係愛國先驅,受奸人讒害,鬱鬱不得志自投汨羅江;南朝宋國嘅檀道濟驍勇善戰,北方胡人聞其名而喪膽,數十年唔敢南下,點知功高震主都係死罪,留下「自毀長城」呢個成語令後人慨嘆不已;仲有家喻戶曉嘅岳飛,精忠報國,正當佢諗住率岳家軍直搗黃龍,恢復舊山河之時,竟被高宗及秦檜以「莫須有」罪名陷害,屈死風波亭;更加唔使講憑一句「掉哪媽,頂硬上」名留青史嘅袁崇煥,鎮守大明北方江山,唔單止慘死於崇禎皇帝刀下,更落得被民眾分食其屍嘅悲慘下場。血的教訓在眼前,換轉係你,仲敢唔敢愛國吖?

愛國嘅下場可悲,愛港嘅結果亦唔好得幾多。事關港府敵友不分,是非不辨,黑白顛倒,倒行逆施,放生嘅罪人,製造嘅冤案不知凡幾,最新鮮熱辣嘅例子,莫過於退休前警司朱經緯案。佢被指控喺佔中期間執法過當而被判刑,日前上訴又失敗,淪為階下囚。朱Sir千錯萬錯,都係錯在執行中央及港府指令過分認真,淪為反中亂港勢力眼中釘、肉中刺,卒之畀人用完即棄,兔死狗烹。七警案亦係一樣,因為佔中期間執法惹禍,判決從快從重從嚴,結果都係有冤無處伸,有苦無路訴。講番轉頭,七警又好,朱Sir都好,如果佔中期間有法不依,甚至掉轉槍頭,莫講話唔使受靶,分分鐘成為大英雄。今時今日香港地,執法變犯法,犯法變英雄,再爆多次佔中、旺暴一類大案,警方仲敢唔敢執法?係選擇做藍絲定黃絲?估都估到喇!

事實擺在眼前,反中亂港勢力要風得風,要雨得雨,要保護傘得保護傘。佔中落幕眨下眼四年,執法者紛紛被入罪,反觀佔中搞手只有九人被控,包括漢奸黎在內嘅三十多名搞手繼續逍遙法外。再講黑金禍港呢筆,長毛等收錢政客袋袋平安,金主漢奸黎更因為律政司一句「證據不足」,連檢控程序都慳番。仲有暴力衝擊政府東翼廣場、提前觸發佔中嘅「雙學三子」案,早前因為司法機構僭建一個「新指引」而既往不咎嘞,仲順便帶挈埋暴力反對新界東北發展被判刑嘅十多名被告,因為「新指引」獲得特赦。照咁嘅混帳邏輯,佔中案發生喺「新指引」之前,一眾搞手、金主、黑手一樣可以萬事大吉,一早揚言「唔怕坐監,最怕洗廁所」嘅漢奸黎,睇怕連廁所都洗唔成。鬼咩,港府畏洋如虎,面對漢奸黎呢挺背後有外部勢力撐腰、身邊有鬼佬助手護駕嘅天字第一號洋漢奸,港府就算食咗豹子膽都唔敢郁佢一條毛喇,吓話!

洋奴漢奸 呼風喚雨

再睇吓另一單畸士。漢奸黎舊年六月喺維園粗口辱罵兼刑事恐嚇東方記者,整個過程有圖有片證據如山,警方一早完成刑事調查,點知律政司當冇事發生,東方報業同埋受害記者之前八度致信詢問案情進展,律政司唔係將個頭埋落沙堆,就係官話廢話空話連篇,一味帶人遊花園。三國時代嘅孟獲蒙昧無知,但係經過諸葛亮七擒七縱,最終都良心發現,偏偏律政司係都要等到東方致第九封信,先至死死地氣開綠燈,指示警方為漢奸黎落口供,簡直吹脹。不過千祈唔好以為錄咗口供就代表律政司終於肯做嘢喎,受害記者日前再度致信要求就檢控漢奸黎定出明確時間表,律政司係就係翌日回覆,但就話檢控時間視乎案情證據及複雜程度喎,答咗等於冇答,擺明繼續愚弄受害者,侮辱港人智慧。

問心吖,呢單畸士案情簡單,證據確鑿,要落Charge有幾難呀,律政司點解係都要扮縮頭烏龜,係都要做漢奸黎嘅保護傘,係都要助紂為虐?夠薑嘅唔該公開發表聲明,但凡涉及漢奸黎同埋反中亂港勢力嘅畸士,一律放生,或者好似每年七一授勳頒荷蘭水蓋咁,為漢奸黎及其徒子徒孫頒發「鐵券丹書」、「免死金牌」,等大家唔好再指望「法律面前人人平等」都好吖!

睇到喇,香港雖然號稱法治之區,又話法治係香港嘅核心價值,實情係「核心價值」已經變成「黑心價值」,法治精神呢塊招牌被蛀得百孔千瘡,當柴咁燒都得咯。前任律政司司長「猿國強」拖延檢控佔中,淪為過街老鼠,換咗個「僭建驊」仲衰,開工第一日就被踢爆「大宅僭建」醜聞,狼狽不堪,之後仲同反中亂港勢力達成政治交易,以放棄檢控同漢奸黎有關嘅案件,換取對方停止對僭建案嘅追殺,至此港府「大和解」嘅底牌終於大白於天下,就係不惜以犧牲法治為代價大搞包庇放生,嗚呼哀哉!

講到尾,港英餘孽身在漢營心在曹,教育、司法等刀把子部門操於別人之手,呢個正正就係回歸廿一年、衰足廿一年嘅病根嘞,乜嘢「港人治港係以愛國愛港人士為主體嘅港人治港」、乜嘢「擴大愛國愛港陣營」,純屬空話。

哀莫大於心死,唔理中央點樣出盡牙血,話要重推國民教育課,培養年輕人國家意識,奈何歷史同現實卻係反中亂港一條龍,愛國愛港一條蟲。講到呢度,相信好多人同功夫茶一樣𢱑晒頭:中央收回香港但又唔肯端正主人翁態度,坐視香港七國咁亂,咁樣嘅回歸究竟有咩意義!