有為嘅政府會物盡其用，地盡其利。可惜吖，特區政府特別無能，特別慵懶，特別神經分裂，呢頭問地從何來，嗰頭就坐視大批靚地唔識用，簡直吹脹。
呢，土地大辯論為期五個月嘅諮詢期就嚟結束，有團體就發現喺嗰十八個土地選項以外，原來仲有唔少漏網之魚，就係港府藏藏掖掖嗰五百幾幅未善用嘅官地。呢批官地總面積唔嘢小，足足逾三百公頃，相當於十四個太古城咁大，足夠興建九萬個過渡性房屋單位，滿足逾二十萬人嘅住屋需要，仲要遍布葵青、元朗、屯門、大埔等有晒現成社區、交通配套地區，只要政府肯拍板起屋，即刻可以紓緩到中、短期土地需要。不過政府情願由得呢批靚地用作臨時停車場、儲物室或者官僚辦公室，都唔益市民，仲要一味話覓地起屋難，營造土地供應緊張嘅假象，係心盲定發雞盲，仲使問咩！
你話嘞，民間可以發現到咁多未被善用嘅官地，官老爺卻反而懵然不知，簡直係白（手豆）人工嘅廢物。若然好似團體所講，政府喺批出土地嗰陣黑箱作業，既有將短租用地批予遊艇俱樂部長逾三十年，亦懶理政府部門遲遲不交還臨時撥地，咁就唔止係詐癲扮傻咁簡單，直頭係向權貴傾斜兼助長廢衙門霸靚地，擺明搵市民笨呀。
政府擘大眼講大話，一方面話有嚴重土地荒，唔填海、唔開發郊野公園、唔毀人家園收地都搞唔掂，另一方面就手握大量靚地唔加以善用，話唔係精神分裂都唔得喇。嗱，依家唔係話有呢三百公頃官地就足夠解決香港房屋問題，其他土地開發工作可以就此打住，而係話比起開發郊野公園邊陲地帶同填海造地，呢啲冇十年廿載唔使諗嘅選項，呢批現成官地可以即刻用嚟起屋應急，解決唔少住房問題，咁點解眼前熟地唔用，反而一味捨近求遠，捨易取難？
睇到喇，呢個政府就係咁廢，唔係遠水救近火，就係一味望天打卦。家陣息口大勢向上，加上中美貿易戰影響，樓市存在下調嘅可能性，如果港府覺得樓市過熱問題有望緩解就放慢拓土動作，咁就弊傢伙。實情係，不管樓市升定跌，住屋都係剛性需求，好似食飯、飲水咁，若然學前特首曾蔭權爵士咁為咗頂住樓價，在任七年停建居屋、減少土地供應，結果咪搞到香港房屋階梯出現斷層，無殼蝸牛上樓無望，種下房屋問題禍根囉。
點都好喇，林鄭政府有地都唔識用，就好似港府庫房滿瀉卻一味喊窮，拒絕扶貧濟困，虛偽到冇朋友，香港民怨載道知點解喇！