阿里巴巴集團始創人馬雲早前宣布出年就退休，被俄羅斯總統普京問佢搞乜五十幾歲就退休，仲話自己六十幾歲都未退休啦。其實幾時退休因人而異，不過特衰政府一心想推卸安老責任，於是就諗計鼓勵人延遲退休，就認真可惡呀。
呢，勞福局局長羅致光尋日喺網誌發功，話社會係時候鼓勵僱主延長員工退休年齡，佢仲話由八十年代開始，年過六十至六十四歲o既男女勞動參與率明顯下降，去到二○○四年至上升番，話係政府實施法定最低工資，令基層員工薪酬得到改善得出o既結果喎。家陣特衰政府就再做多一次「善舉」，等大家可以延遲退休嘞。
講真，咪以為羅局長主動為班年長打工仔發聲，又搬出勞動人口喺未來會愈來愈緊張咁，實際上講嚟講去，政府只係想逃避安老呢個大包袱，於是整色整水，最好社會上嗰班「登六」人口可以留番喺職場愈耐愈好。正如羅局長喺網誌度鬼拍後尾枕話齋，「退休年齡」其實就係指領取退休福利o既年齡，年長人口遲啲退休，政府就可以慳番一大筆，政府為自己荷包設想，梗係吹行延遲退休呢壇嘢啦。
不過咁喎，政府落足嘴頭，但係就得個講字，除咗啲過氣高官有得無限翻閹外，根本就唔會帶頭聘請「中老」、「少老」打工。政府識得靈活變通，商界何嘗唔曉得陽奉陰違？若果政府旨意每月發放幾千蚊在職培訓津貼，為期半年至一年，就可以令商界落疊，實在係睇小咗僱主會攞完津貼，就將長者用完即棄、炒魷魚o既行動力。
真係諗極唔明，港府作為世上數一數二o既有米政府，大型基建隨隨便便都掟幾十億落鹹水海，但係花少少錢搞安老就好似要割忽肉出嚟咁，唔止講明唔會降低各項長者津貼o既申請門檻，仲要掉番轉頭話長遠應該上調領取福利年齡添，有高官仲自爆庫房啲錢係用嚟支付公務員o既退休金，只有官至可退而無憂，小市民就要食自己。呢個政府善財難捨，冤枉甘心，都可以話係冷血涼薄o既人辦。
講到尾，香港唔少人七老八十仲要做，揸的士、揸小巴，甚至執紙皮，唔係為咗日曬雨淋貪過癮，係窮咋！鬼叫政府安老政策唔掂，調查仲話港人長壽冠全球，平均八十歲起碼，只靠個人積蓄同強積金雞碎咁多錢，玩吓手就搣晒，惟有焗住幾十歲人都要繼續做，點敢輕易言休呀？
冇計喇，喺特衰政府o既無能領導下，高官就只識殘民自肥，港人準時交稅，到頭來乜安老福利保障都冇，想唔拋個身出嚟做都唔得啦。