問問各位，若然行行吓街人有三急，又唔知公廁喺邊，會點做呢？攞個手機出嚟查公廁位置定係搵人打聽？唔使搞咁多嘢o架，拜港府無能所賜，只消用個鼻哥聞一聞，嗰陣強烈氣味就自然而然會引領你去目的地o架喇。
講起就羞家咯，有政黨就去咗中西區，調查咗二十六間人流最多嘅公廁，結果得人驚。當中超過一半都係廁格充斥異味，抽氣系統差，就連尿槽、馬桶同洗手盆都有損毀同污漬。衞生最差嘅水街男公廁，未到公廁範圍遠遠都能聞到嗰陣味。公廁環境咁惡劣，想話快手快腳解決完走人咩？對唔住嘞，比起五年前只得兩成公廁長期積水，依家激增到六成公廁都係一攤二攤水，一個唔小心，跣到攤攤腰o架。總之，香港公廁嘅衞生情況就大倒退啦。
有人話，一個地方係咪文明，睇吓佢哋嘅公廁環境就知。照咁睇，香港呢個國際大都會真係失禮死人，你話嘞，連中西區呢個金融中心啲公廁都係咁污糟邋遢，其他各區嘅公廁只會等而下之。香港地既有維港兩岸摩天大樓鱗次櫛比嘅光鮮一面，仲有臭到中人欲嘔、掩鼻而過嘅公廁，同埋老鼠成群曱甴成堆嘅後巷橫街，可以話係「一國兩制」下嘅另一番妙趣。
香港公廁又臭又污糟，同部分市民欠缺公德心脫不了關係。即使張貼再多嘅「上前一小步，文明一大步」善意提示，缺德用家都係睬你都傻，方便時唔揭起廁板，或者直接踎喺廁板上，罔顧下一手用家嘅需要。近日爆出有紅館清潔工抱怨女廁地板變尿塘，證明咗香港人成日嘲笑內地同胞不文明、冇公德心，其實係五十步笑百步，甚至一百步反笑五十步添。事關內地近年推行「廁所革命」，領導人講明廁所問題非小事，景區、城市、農村都要做好廁所建設，結果唔少內地公廁衞生程度好過香港多多聲。
睇到啦，公廁衞生只係事在人為嘅啫，除咗教育市民，負責管理嘅部門都唔可以側側膊。好似康文署咁吖，管理嘅公廁衞生評分比食環署要高少少，原因就係康文署職員自己都要用嗰啲室內運動場嘅公廁，搞臭佢咪即係同自己過唔去？反觀食環署唔止將清潔工作外判，搞到清潔工得雞碎咁多人工，仲有對清潔工呼呼喝喝嘅刻薄前科，大熱天連飲啖水都唔得，咪使旨意清潔工會賣力洗廁所。
一廁之不掃，何以掃天下？講到尾，香港爆過沙士、豬流感、登革熱等不同疫症，全因衞生搞唔好。港府連個廁所都搞唔掂，仲話強政勵治、與民同行喎，咪笑大人個口嘞！