都話錢解決到嘅問題就唔係問題，港府偏偏相反，錢係就係大把，之不過解決唔到問題之餘，仲隨時適得其反。話口未完啫，又有新鮮滾熱辣嘅例子嘞，官僚靠得住，豬乸會上樹，唔到你唔信。
嗱，香港人口老化加劇，資助安老服務僧多粥少，業界就賴人手不足所致。港府都算從善如流，早前撥款三億多元畀資助安老院舍嘅指定職位調整薪酬，期望改善業界待遇，吸引人才入行喎。可惜吖，港府做嘢例牌是是但但，話就話撥款用於加人工，實際上留有尾巴，容許機構彈性處理撥款。咁即係點？即係過分彈性變相剝削員工囉，即係政府畀完錢就關人個關囉。
唔係講笑，先後有工會收到業界員工投訴，話至今未收到任何增加撥款嘅資訊，連有乜嘢工種受惠亦唔清唔楚，遑論加人工。工會仲踢爆，部分機構或將職位巧立名目，或乾脆易名，總之就係唔將撥款用喺前線員工身上。咁仲唔止，近排仍有機構以低於社署起薪點嘅薪金聘請個人照顧員，擺明剝削，到底筆錢用咗去邊呀？
喂，大拿拿三億元公帑有如泥牛入海，港府居然不聞不問，簡直混帳。係人都知，安老服務向來缺人手，員工唔係做到有氣冇碇抖，導致流失率高企，就係索性將怨氣發洩喺老人家身上，搞到虐老醜聞層出不窮，本來重賞之下必有勇夫，難得港府肯開水喉改善行業待遇，有望扭轉行業歪風，偏偏敷衍塞責呢鋪癮點戒都戒唔甩，畀完錢就當了咗責任，乜都唔理咯喎，唔亂象叢生至奇。
正所謂，泥水佬開門口，過得自己過得人。安老服務吸引唔到人才入行，待遇偏低、工作量重係主要原因，資助安老院舍攞咗撥款，好應該用番喺員工身上，提高待遇同服務質素，家陣就咁將公帑袋袋平安，點止黑箱作業吖，更被質疑有貪污之嫌，港府點可以闊佬懶理。工會要求當局訂立撥款使用指引，確保公帑用得其所，唔係無的放矢o架。
話時話，社福機構財政混亂都唔係今日嘅事，肥上瘦下、亂派花紅、入不敷支乜都齊，醜聞水蛇春咁長，講到尾就係港府對一筆過撥款制度冇監冇管惹的禍。冇計嘞，港府冇心冇肺、尸位素餐，對長者尤其刻薄，最叻就話引入外勞了事，根本就係推卸安老責任。
講到呢度，功夫茶諗起多年前一位內地「首善」當街派錢嘅扶貧「善舉」，一時博得唔少掌聲，後來被揭發沽名釣譽、捐贈造假。港府畀完錢就拍拍屁股話之你，對安老服務嘅亂象視而不見，其實一樣咁偽善嘅咋。