但願人長久，千里共嬋娟。中秋佳節就快到，一家人食飯賞月，共敍天倫，真係一大樂事。不過開心還開心，如果因為過節而做大嘥鬼，破壞環境，製造浪費，咁就本末倒置嘞。
嗱，環保團體每年都會統計中秋節嘅浪費情況，今年係點仲要睇過至知，但舊年港人丟棄月餅數量大有改善，總算係個好開始。受訪者家庭去年平均食用七點一三個月餅，丟棄零點三八個月餅，比前年丟棄零點六四個減少四成，創十五年來新低。同時有兩成受訪者表示今年唔買月餅，環團預計丟棄月餅嘅數量有機會再創新低添。
唔該掌聲鼓勵吖。你知喇，港人出名眼闊肚窄，送禮成風，一個家庭閒閒哋有幾盒月餅，真係唔嘢小，結果搞到年年都有大量月餅當垃圾丟棄，諗起都冇衣食。可能近年環保風氣盛行，綠色思想潛移默化，終於收到成效啩，港人浪費月餅嘅情況有所收斂，雖然仍有九十七萬個月餅被丟掉，唔係小數目，但相比往年浪費過百萬個月餅，點都叫做有啲進步嘞。
當然喇，減少浪費唔止由市民做起，商家亦應多行一步，互相配合，否則事倍功半，都係嘥氣。可惜吖，環團調查今年市面嘅月餅包裝，發現一般盒裝月餅至少有十個包裝組件，都咪話唔誇張。有啲品牌為咗產品好睇啲，特登整大月餅盒，再利用塑膠組件托高盒內月餅，加埋送贈嘅膠刀膠袋，產生唔少廢塑膠，而且今年冇乜商家推出環保包裝月餅，變相減少消費者嘅選擇，地球先生真係多得佢哋唔少咯。
咁講喇，天下熙熙，皆為利來。只要市民堅持環保消費，月餅生產商為咗迎合市場，點都要加入環保元素，減少過度包裝，不過講到近年中秋節必備嘅螢光棒咯喎，咁就難搞得多。螢光棒一盒幾十支，掛滿一身閃閃發光，小朋友就最鍾意。係就係好過癮呀，弊就弊在螢光棒用完即棄，當中又含有玻璃管及化學溶劑，難以回收，去年每個家庭平均丟棄近四十七支，全港丟棄逾三千萬支，全部送去堆填區，唔止堆填區遲早逼爆，化學物質有害環境先至最大鑊。
所以話啫，將自己嘅快樂建築喺地球先生嘅痛苦之上，真係好缺德o架，尤其係香港人均垃圾量冠絕全球，逢年過節仲要加倍浪費，遲早自食惡果。計功夫茶話齋，綠色中秋，人見人愛，大家買少啲、食少啲、玩少啲，環保效果已經立竿見影，如果將食唔晒嘅月餅轉贈有需要人士，咁就仲有意義。講到尾，中秋佳節人月兩圓，珍惜同家人相處先至係最重要吖。