豆腐渣醜聞不斷 沙中線未用先殘

港鐵沙中線豆腐渣工程醜聞愈揭愈有,愈揭愈臭,目不暇給嘅程度,話係眨咗下眼就追唔切都不為過。沙中線都未通車啫,又爆出紅磡站有石屎剝落同鋼筋外露,呢條花咗近千億嘅鐵路未用先殘,話唔係豆腐渣都唔得喇。

呢,沙中線沉降問題未了,運房局局長陳帆又自爆紅磡站有月台層板石屎剝落同鋼筋外露問題,月台底部混凝土仲有「蜂巢形」現象添。係人都知,呢啲通常喺啲有番咁上下歷史嘅建築物先有嘅歲月侵蝕問題,家陣沙中線顛覆傳統,未老先衰,真係唔到你唔服。不過,政府又係例牌菜拍晒心口,話有瑕疵嘅石屎已經移除,唔影響結構安全,仲話要港鐵十四日內提交修復方案喎。喂,當初倒石屎工序,政府話進行過三次驗收o架喎,依家出咗事官老爺就關人個關,仲有冇離譜啲吖。

講真,沙中線醜聞五日一小爆,十日一大爆,仲有幾多問題未曝光,冇人話得埋,偏偏陳帆講到懶負責任咁,話「沙中線唔安全、唔開車」,靠唔靠得住吖,咪畀人睇死,到頭嚟咪又係港鐵話OK就OK。大家有眼見,港府同港鐵合謀隱瞞醜聞,誤導公眾,早已前科纍纍,如果有日真係不幸發生車毀人亡慘劇,陳局長一句「我睇報紙至知」,分分鐘又係推得乾乾淨淨嘅咋!

有議員問政府,港鐵管理出咗咁多醜聞,係咪會扣起畀港鐵嘅工程管理費當懲罰?咪天真喇,政府係港鐵大股東,管理費只係左袋交右袋,就好似港鐵延誤罰款,最終咪又係納稅人埋單,管理層繼續高薪厚祿,至於承建商施工連番甩漏,更加從未見過有人要上身。所以話,高官問責制淪為高官卸責制,講乜都嘥氣。

講到呢度,相信讀者諸君可能同功夫茶一樣有好大嘅疑問。港英時代,政府效率號稱全球一流,就講玫瑰園計劃吖,十大核心工程,一千五百億元就搞掂,而且至今未出過大事故,點解同一套公務員系統回歸後變得面目全非,十大基建項目延誤超支不在話下,更紛紛淪為豆腐渣工程?有人質疑港英餘孽夾埋無間道專登搞破壞,係都要搞臭「港人治港」個朵,唔係冇道理o架!

話時話,家陣不時有人話懷念殖民地管治,連班毛都未出齊嘅o靚仔都話港英好,仲有人主張大英帝國再度君臨添。末代港督肥彭返港,次次都受到夾道歡迎,大家知點解喇。

肥彭當年預言,回歸後威脅一國兩制、港人治港嘅唔係北京,而係香港人,睇番香港回歸後諸事不順,證明佢講得冇錯,亦證明港英撤退前埋下嘅大批暗樁地雷,已經發揮無窮威力!