家陣想成為南韓嘅人氣模特兒，唔係得個樣靚或者擁有前凸後趷火辣身材就得，仲要跳得、唱得同演得，咁先至可以作多元化發展，令更多嘅人認識到佢嘅魅力，好似徐允雅就係好例子，佢相當跳得，真係「舞」得彈！
天生擁有過人魅力及誘人外形嘅徐允雅，自細便希望成為一位出色嘅舞蹈員，為咗達成夢想，細個時已經開始進行舞蹈訓練，及至成年後更先後喺漢陽大學及首爾藝術大學嘅舞蹈系進修。正當佢以為會以跳舞作為終身事業之際，卻喺一次偶然機會下兼職做攝影模特兒，從此改變咗佢嘅一生。話說喺大學修讀期間，有朋友問佢有冇興趣一齊兼職做攝影模特兒，起初佢一啲興趣都冇，但係發覺工作時間夠彈性，又可以賺快錢，於是便答應對方。徐允雅憑住出眾嘅外形，尤其係玲瓏浮凸嘅火辣身材及優美嘅體態，唔單止獲得攝影師嘅好評，更獲得模特兒事務所青睞，邀請佢轉做職業模特兒進軍模特兒界，經過佢同屋企人商量後，喺2009年便以職業模特兒身份出道。之後，佢不但繼續做攝影模特兒工作，更喺賽車比賽中以賽車女郎身份登場。擁有激凸上圍及修長美腿嘅佢，換上性感嘅低胸賽車女郎制服後，甫出場即成為焦點，令人氣爆發！不過徐允雅表示，對於當日嘅演出印象並唔深刻，皆因佢全日都極之緊張，幸好順利過關並且為佢嘅事業開啟新嘅一頁。
先後喺多個賽車活動中亮相嘅徐允雅，不但人氣愈嚟愈高，工作量亦愈嚟愈多，雖然壓力好大，不過對於自細接受舞蹈訓練嘅徐允雅嚟講，早就練出堅毅嘅性格，所以亦難佢唔到，加上經過一段演出日子後，令佢愈嚟愈鍾意模特兒呢份工作。眼見徐允雅嘅人氣不斷攀升，於是事務所安排佢以車模身份喺車展上以優雅形象登場，帶畀大家新鮮感，結果獲得一致好評。正當大家期待徐允雅有更好嘅發展之際，卻因為疲勞過度而大病一場，經過半年時間休養後終於可以復工，而事務所就安排佢參加賽車女郎比賽，徐允雅狀態大勇，而且充滿自信，最後獲得亞軍。之後徐允雅食住個勢，又參加車模新人賽，愈戰愈勇嘅佢，結果喺比賽中獲獎。密密參加比賽嘅好處，唔單止令徐允雅嘅人氣達至頂峰，工作量亦排山倒海，不過有別於之前，就係佢識得安排自己嘅休息時間。與此同時，佢亦開始發揮自己嘅跳舞專長，不但喺活動中以舞技示人，更參加唔少演出活動，憑住出色嘅舞藝，加上迷人嘅外形，令佢終於成為一位全面嘅模特兒，至今活躍多個模特兒界別。
簡介：近年徐允雅專攻攝影模特兒工作，頻頻喺男士、美容等雜誌上亮相。雖然佢已經喺模特兒界工作咗一段時間，但外形仍保持得相當好，女人味愈嚟愈濃，難怪粉絲愈嚟愈多啦！如果大家想了解佢多啲，就要Click入呢個網站喇！
網址：http://cafe.daum.net/s-yuna
出生地：大田廣域市
身高：171cm
三圍：35-23-35
撰文：魂