如果香港嘅房屋問題，可以好似耍太極嘅口訣咁：「一個大西瓜，中間切一半，一半分畀你，一半分畀佢」，只係需要擺平兩瓣人嘅需要，咁就好辦咯，弊在香港係個多元社會，加上港產庸官淨係識耍太極，搞到單身人士要等三十二年至上到樓，楊過等小龍女都係十六年咋，你話班公屋申請人有乜辦法唔萬念俱灰，仲慘過跳絕情谷吖。
呢，立法會房屋事務委員會前日討論非長者單身人士輪候公屋問題，有議員炮轟一般家庭申請者平均等四點七年就可以上到樓，而單身人士若按「配額及計分制」去推算，就要等足三十二年至有機會上樓，亦即係十八歲開始申請，都要等到五十歲至上到樓，批評政府歧視單身人士，向佢哋開刀喎。
即係咁，公屋求過於供已經唔係今日嘅事，坊間甚至形容抽到公屋等於中六合彩頭獎，可想而知機會幾咁渺茫。咁又係呀，依家公屋輪候冊有超過二十八萬宗申請，但未來幾年每年只係得萬零個公屋單位供應，試問擔沙填海條數點追呀。運房局仲講到明，會先幫有迫切需要嘅家庭上樓先，又話依家嘅措施已經平衡咗單身人士需要，咁即係點？即係十二萬非長者一人申請者，唔該畀啲耐性慢慢等喇。
睇到喇，公屋個餅就係得咁細，公屋供應唔夠，先天不足，後天仲可以點安排啫，如果喺計分制上面優待單身人士申請者，同一時間即係要家庭申請者蝕底，呢個係零和狀態，個餅點切都唔可能皆大歡喜，嗰班垃圾會議員一味企喺道德高地，又提唔出實際建議，到頭來只會挑動窮人鬥窮人，激化單身人士同家庭申請者之間嘅矛盾。成日話班無良政客為咗搞搞震、玩拖延無所不用其極，就係咁解。
當然喇，公屋供求嚴重失衡，歸根究柢罪魁禍首都係特衰政府。房屋政策做得唔好，喺市民心目中評分包尾；覓地起屋不力，私人樓價高處未算高，搞到逾二十萬人要住喺二百呎唔到嘅劏房，或者屈喺比單人囚室仲要細嘅四十三呎納米單位過活，真係港人嘅悲哀。最弊係港府知錯唔改，反而整色整水，仲搞啲咩「土地大辯論」，咪畀人睇死吖，特衰政府根本唔敢郁動權貴利益，話就話掟粉嶺高爾夫球場嘅私人遊樂場用地出嚟做選項，實際上只係Hea吓市民，「大辯論」喎，「大吹水」、「大整蠱」就差唔多！
你話嘞，香港人只係想有個竇口棲身啫，都要歷盡九九八十一難咁，唔通真係要基層市民通通去晒瞓豬欄、住雞棚，政府先心息？政府無能，政客無良，市民無奈，真係講起都一殼眼淚。