要數特衰政府最口是心非嘅人物，一定非特首林鄭月娥莫屬，雖然佢外號叫「好打得」，又話「官到無求膽自大」，但實際上講一套做一套，人前人後兩個樣，語言偽術嘅功力簡直青出於藍。
呢，日前係汶川大地震十周年，港產官僚出名鍾意做騷，林鄭當然冇執輸走去當地出席悼念活動喇，點知期間有香港電視台記者採訪遇襲，鬧出不小風波。林鄭尋日一返到香港咋，即刻急不及待喺咪兜前認叻，佢話喎，港府非常關注有記者被打，仲話一知道呢件事，就即刻聯絡國務院港澳辦同埋四川省港澳辦要求徹查，強調「傳媒在外地及內地合法採訪，需要受到尊重」，幾咁大義凜然呀。
其實林鄭知唔知醜字點寫o架？好心咪講埋呢啲自打嘴巴、三歲細路仔都唔信嘅說話啦。係，表面睇，林鄭今次擺出新聞自由神聖不可侵犯嘅姿態，內地有關部門話都冇咁快就搵咗兩個人出嚟道歉，仲同被打記者揸手添，之但係林鄭係咪真心重視新聞自由，係咪真心尊重傳媒，心照喇，做戲咁做咋。
好簡單，漢奸黎刑事恐嚇東方記者案就係試金石。係人都知，東方記者舊年喺六四集會上進行合法採訪，期間突然被漢奸黎以「×你老母×」、「我實會搵人搞×你」、「我影×咗你嘅相」辱罵恐嚇，過程被攝影機拍下，有圖有片鐵證如山。之但係律政司拖拉十一個月，依然唔將漢奸黎落鑊，東方前後六度去信質詢，最後一次仲要係受害記者親自發信，點知律政司一樣置若罔聞，唔係以虛話、廢話搪塞，就係好似活死人咁毫無反應。你話喇，若果林鄭真係重視新聞自由，早就應該開聲譴責嘞，點可能容忍漢奸黎打橫行，任由律政司庇奸護淫吖？
講真，林鄭虛偽就路人皆見嘅嘞，最衰係身在漢營心在曹，對反中亂港集團姑息養奸，漢奸黎身為反對派金主，更加獲得厚待。淨係政治黑金案咋，明明證據確鑿，律政司都可以公然放生，擺明有政治交易喇。所以話啫，林鄭所謂尊重傳媒採訪喎，尊重新聞自由喎，都要睇係邊一間傳媒嘅自由咋，如果加害人係壹淫媒漢奸黎，受害者係正義傳媒，講得幾漂亮都係嘥氣。
睇到喇，香港話就話係法治之區，實則一制兩法，法律固然優待反中亂港集團，就連新聞自由都搞出雙重標準。真係諗極唔明，大家都係記者，大家都喺採訪期間遭受暴力對待，點解林鄭要厚此薄彼呢？到底係正義傳媒好蝦，定係漢奸黎惡晒，抑或係林鄭欺善怕惡，大家心中有數喇。