喺管理學入面有樣嘢叫「鯰魚效應」，意思係透過引入競爭，令弱者感受到威脅，於是唔敢再懶，係種激發弱者變強嘅人事管理手段。睇番香港嘅醫療事故之所以鑊鑊新鮮鑊鑊甘，就係因為香港醫療體系根本都冇競爭，加上醫醫相護，想唔出事都難啦。
呢，聯合醫院一位女病人早前喺手術期間懷疑被導管刺穿頸動脈引致中風，全城嘩然，院方尋日話就話發表檢討報告，實情係卸責報告就真。佢哋話喎，醫生當日為病人進行導管手術符合晒標準，唔涉及人為疏忽，對於醫生動手術前冇同病人家屬提過有機會中風，報告就輕描淡寫，淨係建議醫生以後唔好只用「高風險」、「低風險」呢啲籠統字眼，要解釋清楚喎。咁即係點？即係「手術好成功，不過病人唔好彩」，即係冇人需要被問責咯。
喂，做醫生之所以係高尚職業，之所以收入豐厚，就係因為懸壺濟世、妙手回春吖嘛，家陣救人不成反變害人，仲話係妙手仁心？講番呢單畸士，做動脈導管手術，落手重啲或者輕啲，差之毫釐，已經係生與死嘅重大分別，人命攸關，點可以掉以輕心、求求其其？當局一味醫醫相護，次次唔係話病人唔好彩，就係檢討報告問責，提一大堆冇用嘅指引，點對得起市民嘅信任，點對得住「救死扶傷」呢四粒字吖？
講起公立醫院醫療事故無奇不有，真係火都嚟埋。打錯針、輸錯血、開錯刀、開錯藥，呢一類醜聞幾乎無日無之，唔知幾多人受害。呢，近日有醫生為嚴重關節炎患者換脛骨，開刀時至發現買錯材料，本來要更換嘅係左腿脛骨，點知買來嘅假體竟然係右腿用嘅，更加匪夷所思嘅係，醫生將錯就錯，咁就完成一單手術嘞。左右不分，真係荒謬到極，幼稚園第一日已經教啦。如果手術前有認真核對確認資料，呢類低級事故完全可以避免，事件屬於系統性出錯，醫療系統咁樣草菅人命，仲有冇離譜啲吖。
堂堂公立醫院，點解事故頻率咁高？其中一個主要原因就係，本港醫療體系係個既封閉又受盡保護嘅白色巨塔，出咗事就整份調查報告，從來冇人需要問責，「下次留意番」咁就算數，犯錯唔使受罰嘅話，質素想好都難啦。大家有眼睇，醫界呢頭話人手短缺，做到有氣冇碇抖，嗰頭又藉口多多反對引入海外醫生，自私自利，拒絕競爭，結果就係物種退化，技術及醫德一齊退步有乜出奇吖。好似喺菲律賓人質事件中下顎中槍嘅易小玲，喺香港前後做過幾十次手術都解決唔到問題，過海到台灣求助，一次手術搞掂，高下立判。
一句到尾，香港醫療事故爆唔停，都係因為公共醫療體系腐敗，既無仁術更無仁心。過去人話「一日一蘋果，醫生遠離我」，睇嚟香港人真係要靠每日食蔬果救命咯！