等到頸都長嘅政府選擇性派錢方案尋日終於公布申請資格，不過市民等到唔耐煩唔代表政府慢工出細貨，事關唔少市民睇完個申請資格依然一頭霧水，香港呢個蠢政府派錢都派到亂七八糟，硬係要搞到市民唔媽媽聲唔安樂嘅。
嗱，港府尋日就喺在職家庭津貼辦事處網頁公布「關愛共享計劃」申請資格，分咗「申請資格」、「居港要求」、「工作情況」同「物業情況」等六個大項，成三十一條細項去講解，但好多市民都話睇唔明。就好似攞緊在職家庭津貼或就業交通津貼嘅市民吖，究竟仲有冇資格攞錢，網頁語焉不詳，淨係叫人參考另一題目嘅答案，弊在個答案根本冇交代清楚，簡直畀佢玩死。唔止市民睇到一臉「黑人問號」，半官方嘅社區幹事都話投降，可想而知個網頁幾咁混亂、幾咁幫唔到手。不過有樣嘢政府就講到好清楚喎，就係胡亂申請可能要負上刑責，都唔知係想叫市民知難而退吖，定係想叫市民博大霧呢？
睇到喇，呢個政府就係咁倒行逆施，明明全民派錢，簡單易明，皆大歡喜，偏偏財爺陳茂波嘅理財新哲學就係要製造分化，添煩添亂。有數得計，上次鬍鬚曾搞全民派錢六千蚊，平均每宗申請嘅行政費用約三十四元，總行政費約一億二千萬元，但今次陳茂波搞選擇性派錢，受惠嘅人數少咗唔在講，平均每宗申請嘅行政費仲要一百二十一元，總行政費更高達三億大元，係咪冇嗰樣整嗰樣吖？
不過咁，眾人皆醒佢獨醉，陳茂波對於呢個超級煩膠嘅派錢計劃顯得信心十足，仲話出年四月就有第一批市民收到錢，暗示政府好有辦事效率喎，真係唔知醜字點寫。喂，家陣先至係四月，即係最快要一年後至收到錢，大吉利是講句，部分老人家隨時等唔切含恨而終，你話政府係咪好帶挈吖。仲有呀，整個派錢計劃又要提供稅單、又要提供物業資料畀當局審查，手續多多，關卡重重，難怪有人話衰過畀乞兒。
講開又講，港產官僚出名冇效率，上次全民派錢唔使審批都搞咗一大餐，今次冇兩、三年都唔使旨意搞掂。最好笑係今次仲話設有上訴機制，唔滿意結果嘅申請者四星期內可書面上訴，簡直搵嘢嚟搞。難為波叔仲好意思話呢百幾億派得其所喎，到底係死撐定係真心膠，大家心中有數。
都係嗰句喇，取之於民，用之於民，天經地義。港府庫房水浸，依然善財難捨，冤枉甘心，好哋哋一項派錢德政都搞到醜態百出，民怨沸騰，市民有錢收都背脊骨落，唔嬲至奇呀！