尋日係五一勞動節，唔少打工仔女例牌上街示威，爭取勞工權益，同埋要譴責好似街坊工友服務處梁耀忠之流咁嘅無良僱主，事關佢開口埋口為勞工出頭，實則帶頭對打工仔搞壓榨同剝削，實在係有口話人，無口話自己。
呢，尋日勞動節大遊行嘅訴求五花八門，好似取消強積金對沖、要求十四周全薪產假、落實全民退保、為傷健人士爭取就業權等，可見社會係幾咁多矛盾，雖然嗌嗌口號，都未必解決到問題，不過發洩吓心頭冤屈氣，都無壞嘅。之但係遊行中發生小插曲，有三個被梁耀忠「炒魷魚」嘅街工勞工組員工，企出嚟大爆梁嘅無良嘴臉，佢哋話三月中收到風勞工組要摺埋，不過直到前晚梁耀忠先肯同佢哋見面交代，一時話財赤，一時又話想搞選舉，總之就係五月後唔會再出糧畀佢哋啦，梁耀忠仲話：「唔出糧唔等於炒人，可以當做義工」喎，真係再無良嘅僱主都講唔出呢番說話，三位苦主梗係鬧爆啦，話以前做畸士都遇過唔少無良僱主衰老闆，依家加多個「梁耀忠」，真係諷刺呀。
睇到喇，一個終日話要為勞工出頭、為弱勢出聲嘅組織，都喺勞動節前夕帶頭請員工食「無情雞」，吖，唔係，按梁耀忠嘅講法，佢呢種唔係炒，係唔出糧啫，佢仍然提供咗義工機會畀員工o架。呢啲咪就係歪理連篇囉，先唔好講梁耀忠身為立法會議員，每月支取議員薪酬連津貼高達十萬元，不過三個員工加埋每月只有四萬多元雞碎咁多人工，拍得住最低工資，佢竟然仲夠膽死開口叫人做個「有汗出，冇糧出」嘅義工，即係免費幫佢打工啫。可見所謂嘅維護勞工權益，講就講得鬼咁鏗鏘有力，到做嗰陣就假嘅，講過「戰士沒有逃避戰場的權利」嘅梁耀忠，唔通就認為老細有逃避出糧嘅藉口？
話時話，梁耀忠游說人做義工，呢個主意都幾好噃，不過應該先去說服佢嗰班反對派同道，例如DQ4嗰班人呢，叫佢哋嘔番晒爭政府嗰筆全數議員薪酬出嚟，事關反對派議員只識搞破壞，唔係搞拉布流會，就係出位達陣，再離譜啲嘅就去搶弱女子手機，汗都唔慌流多滴啦，其實做義工都嫌佢哋搞亂檔，仲想出糧就真係大想頭咗啲。
學梁耀忠話齋：「臭罌出臭草」，身為反對派一員，雙重標準其實唔出奇，不過打佢哋工嘅就慘啲嘞，被人無理解僱完，仲要聽歪理，古人話「大奸似忠」，有道理o架。唔該梁耀忠快啲改番個名，叫「梁歪理」或者「梁無糧」啦。