垃圾會發生政客搶女職員手機鬧劇，港府高官擒擒青撲出嚟譴責，仲報埋警添，反應夠晒快喇啩，之但係犯罪情節更惡劣嘅壹淫媒老闆漢奸黎刑事恐嚇東方記者案，事發至今近十一個月，東方第五度去信質詢，律政司依然唔嗲唔吊，冇晒下文。唔通真係要學似古人發出十二道金牌，律政司先至有反應？
全香港都知，漢奸黎喺舊年嘅六四活動上突然指住東方記者爆粗恐嚇，「×你老母×」、「我實會搵人搞×你」、「我影×咗你嘅相」，幾難聽嘅說話都噏得出口，惡形惡相仲衰過爛仔。整個過程被攝影機拍下，有圖有片鐵證如山，以為漢奸黎呢鋪實走唔甩喇，殊不知案件去到律政司嗰度就卡住咗，遲遲唔起訴，問你服未。
嗱，面對第四權被打壓、新聞自由被威脅，東方當然要據理力爭，今年二月及三月已先後四次去信律政司，質詢幾時先至捨得起訴漢奸黎，無奈律政司一味含糊其詞，拖拖拉拉，講虛話、放煙幕，始終冇答案。忍無可忍，毋須再忍，東方尋日第五度去信質詢，唔知律政司今勻又要扮鴕鳥扮幾耐呢？
咪以為一味龜縮就吹佢唔脹呀，實情係律政司對公眾及各部門有服務承諾，刑事檢控科喺接獲執法機關要求提供法律指引後，必須於十四個工作天內回覆，如問題複雜，亦須於十四個工作天內給予初步回覆，講明大約幾時提供指引。正如學者同立法會議員話齋，漢奸黎單畸士一啲都唔複雜，根本冇可能拖咁耐，何況警方早已完成調查，律政司要提供乜嘢法律指引都應該一早提供完，咁都唔敢告唔敢做，擺明有政治考慮，驚洋奴漢奸有牙，老虎屁股摸不得啫。
畫公仔唔使畫出腸喇，律政司一來懼怕漢奸黎背後嘅外部勢力，二來內部充斥無間道，明縱暗護已經整慣手勢。大家有眼見，淨係壹淫媒宣淫犯賤嘅案底已經厚過電話簿，司法機構次次高高舉起，輕輕放下，話冇古怪都冇人信喇。仲有喎，今年三月東方記者喺壹淫媒大樓外正常採訪，兩名疑似漢奸黎護法嘅男女竟然拍打記者鏡頭阻止，有恃無恐咁款。梗係喇，大大把司法保護傘罩住，漢奸黎仲唔變本加厲咩，咁搞法，莫講話恐嚇記者案遲早甩身，睇怕佔中案都係不了了之嘅咋。
都係嗰句喇，逃避唔係辦法，龜縮解決唔到問題。漢奸黎單刑事恐嚇案證據確鑿，冇得抵賴，律政司繼續拖延包庇，即係知法犯法，助紂為虐啫。萬民有口終須說，律政司可以扮鴕鳥，但絕對冇可能掩住悠悠眾口吖！