香港無錯係一個地靈人傑嘅地方，不過香港更加係一個地「零」人「杰」嘅地方，當港府想喺香港搵塊地嚟起屋都話冇嘅時候，無殼蝸牛上樓無期，真係唔慌唔「杰撻撻」咯。
呢，土地供應專責小組尋日又力谷嗰個關於拓土優次嘅公眾諮詢，大拿拿掟咗十八項拓土建議，畀公眾進行為期五個月嘅大辯論，小組仲懶係安排周到咁分咗兩個階段，第一階段就集中推廣同教育，等社會提高對土地供應問題嘅認知，希望激發多啲市民發表意見，到第二階段小組至會收集意見，再將數據交畀大學研究分析，仲話呢個安排喺質同量都兼顧到喎。
睇到喇，呢個政府為咗掩飾自己喺拓土建屋方面嘅辦事不力，竟然出動到轉移視線呢一招，大搞啲咩土地大辯論，將問題一腳踢番畀市民，話就話等社會各界尋求共識，其實咪又係搞一輪大龍鳳，左諮詢，右研究，中分析，揼夠波鐘咪收工囉，拍拍屁股將問題丟畀下一屆政府，乾手淨腳，幾爽呀。好似上屆政府搞全民退保諮詢，已經試過將香港人當傻瓜，今次搞土地大辯論都係一樣嘅咋，淨係專責小組鬼拍後尾枕話十八個拓土建議落實前都要通過法定程序，就算發展郊野公園邊陲得到公眾支持，都未必能夠通過環境評估，咪即係承認諮詢完一大輪，隨時都係煲無米粥囉。好明顯喇，港府畏首畏尾，隨時轉軚，呢啲諮詢唔係浪費時間、挑起矛盾、搵市民笨又係乜吖？
呢嗱，就講就嚟料。專責小組將粉嶺高球場列作其中一個土地選項，係就係順應主流民意，之不過觸動到權貴利益，佢哋梗係唔肯過你喇。就尋日之嘛，幾十人組成大聯盟走去粉嶺高球場示威，話要捍衞高爾夫球運動喎，仲搞到同支持收回球場建屋嘅人士大打出手添，就知所謂大辯論只係製造分歧，難有共識。仲有喎，當局將新界棕地收番嚟發展起屋，大部分市民支持，但礙於鄉紳勢力，咪又係乜都唔敢做。港府將拓土個波掟畀市民，根本係假民主，姿勢大於實際，你話大辯論最後唔係得個吉，搵鬼信咯。
講真，香港有七百幾萬人，又係多元社會，人人有唔同意見，淨係無殼蝸牛、地產商同環保分子，已經大纜都扯唔埋，要佢哋透過諮詢取得拓土共識，機會接近零。其實港府如果真係有決心解決問題，就好應該擇善固執，迎難而上，而唔係前怕狼、後怕虎，一遇阻力即跪低。所以話啫，旨意專責小組噴一輪口水就可以尋求共識，將阻力擺平喎，實在太傻太天真嘞！