雖然有句說話叫「錢唔係萬能」，不過喺香港生活，冇錢真係萬萬不能，唔止衣食住行樣樣難，就連莘莘學子考公開試，考評局都要起勢加價，少個崩都唔得掂。特衰政府見錢開眼，試問學生家長有乜辦法唔百上加斤吖。
呢，考評局尋日公布出年中學文憑試考試費加價喎，語文科加到六百四十四蚊，其他科目加到四百三十一蚊，加幅高達四個巴仙，都咪話唔乸脷。你知啦，好多打工仔加薪都冇呢個幅度，一個考生如果報考兩科語文科同四科非語文科，考試費就超過三千大元，對基層家庭嚟講係相當大嘅數目嘞。所以話，做家長嘅固然有經濟壓力，做仔女嘅亦都擔心考得唔好，嘥咗父母血汗錢，難怪有研究指中學生快樂指數偏低，唔少人仲有抑鬱同焦慮啦。
當然喇，考評局加價藉口多多，例牌搬出考生人數減少，入不敷支等擋箭牌。講真，考評局係獨市生意，出現虧損都係自己管理不善咋，動輒將成本轉嫁考生，好唔負責任啫。尤其係港府庫房水浸，坐擁千億盈餘，咁都要打劫家長荷包，真係點都講唔通。難為考評局仲話加價已經考慮咗社會經濟情況、考生同家長負擔能力喎，簡直擘大眼講大話，根本係發錢寒就真。
講開又講，財爺陳茂波雖然度出幫考生代繳出年考試費嘅「德政」，可惜眼高手低，引發濫考恐慌，卒之要認衰改為只幫學校考生代繳，話就話今次加價唔關出年大部分考生事，但加開有條路，呢頭畀小小甜頭着數，嗰頭就加番，大玩掩眼法，受害嘅始終係基層子弟。再講吖，家陣唔止考試費加價，最慘係教科書一樣年年加，呢度幾千，嗰度幾千，一闊三大，家長負擔真係好沉重o架。
講起就唏噓，香港教育制度本來已經嚴重不公，有錢人可以為子女報讀國際學校，或者吼實直資名校選擇校網，幫子女贏在起跑線，反觀窮人嘅下一代想要脫貧，只有透過公開試進入大學呢條唯一途徑，依家竟然連考試費都大加特加，變相刁難基層家庭，加深貧富懸殊，唔怪得香港由每七個港人一個窮，變成每五個港人一個窮啦。港府帶頭製造玻璃天花板，簡直豈有此理。
講到尾，港府都係善財難捨，冤枉甘心啫。林鄭話就話重視青年問題，實際上乜都闊佬懶理，唔係搵幾個富二代成立委員會作個關心狀，就係祭出「自由市場」做擋箭牌，對基層子弟讀書難隻眼開隻眼閉。睇到喇，基層家庭無法向上流動，跨代貧窮積重難返，和諧社會從何談起吖！