民航處胡混度日都唔係今日嘅事咯，淨係一個甩皮甩骨嘅新空管系統咋，已經搞到乘客飽食驚風散。點知咁都未算，日前又爆出機場跑道出現障礙物，民航處仍然容許航班降落嘅驚險事件，冇爆大鑊真係要劏雞還神咯。
係人都知，喺民航處嘅無能管治之下，香港國際機場大小事故不斷，呢單驚險事件就發生喺今年一月中。話說一架泰航客機當日抵港降落北跑道期間，右舷輪胎突然應聲破裂及冒煙，輪胎及金屬碎片散落喺跑道出口附近，受影響範圍仲有數米乘數米咁大添。按正常做法，空管人員應該指示其他準備降落嘅航機重飛，等待機管局人員封閉跑道清理，偏偏當日冇咁做，反而容許七班航機繼續降落，有冇再離譜啲吖。
唔係講笑，機場跑道有障礙物，後果可大可小。呢，十八年前法航一架客機喺巴黎機場起飛，正正因為輾過另一客機掉落跑道嘅金屬零件，迅即起火自焚，機上逾百名乘客及機組人員全部罹難，咪就係前車之鑑囉。最不知所謂係，民航處輕描淡寫話「按足程序」處理，仲話已通知受影響機師並獲確認可如常降落，即係將個波拋畀機師啫。立法會議員就講得啱嘞，民航處明知跑道有異物仍任由航機降落，仲搵機師孭飛，唔止係心存僥倖，直情係草菅人命、不負責任喇。
咁點解當局唔封閉跑道進行清理先呢？答案咪就係官僚怕事，擔心封閉跑道引致航班大延誤囉。你知喇，香港機場係全世界最繁忙嘅機場之一，每小時約有六十航班升降，即係平均一分鐘一班，關閉跑道清理障礙物喎，冇半粒鐘都唔使旨意搞掂，即係有幾十班航機受直接影響，何況一延俱延，後來航班亦會受到波及。再講吖，航機未能如期降落，就要喺空中盤旋，耗用燃油增加成本在所難免。民航處為免招人話柄，寧願博一博，之但係呢一博同搵命博冇乜分別，今次就話好彩冇事啫，下次結果係點邊個話得埋o架，民航處將經濟考慮凌駕人命安全，簡直靠害。
話時話，民航處近年啲衰嘢數天光都數唔晒，已故前處長羅崇文公器私用，將民航大樓當成私人王國，已經夠晒離譜，以為新人事新作風喇，點知換咗處長一樣立立亂，新空管系統三日一小壞，五日一大壞，只係冰山一角咋。民航官僚繼續尸位素餐，點止危及香港國際航空樞紐地位吖，隨時可能搞出人命添。
講番今次呢筆混帳，側面反映機場跑道不敷應用，興建第三跑道刻不容緩。之不過以本港大型基建例必延誤超支嘅往績睇，第三跑道幾時先至落成，真係天曉得！