相信唔少人都記得幾年前導遊阿珍逼團友買嘢單新聞，其實普通市民一樣有機會被迫消費，好似健身、美容行業久唔久就爆出用高壓銷售手法，強迫顧客簽帳，消委會最近就提倡設立合約冷靜期，保障消費者權益，不過至怕香港班庸官又係講就天下無敵，做就無能為力咋。
消委會話喎，建議為特定五種類型合約設立唔少於七日嘅冷靜期，等消費者可以無條件取消合約，應用範圍包括健身、美容、時光共享會籍，連喺街頭嗰啲易拉架攤位促銷都受規管，不過顧客自己行入舖頭買嘢或者簽約，就冇冷靜期。消委會話呢項建議清晰、務實又負責任，消費者萬一遇到威逼恐嚇、疲勞轟炸嘅銷售手法，都可以無條件提出取消合約，保障番權益。商務及經濟發展局仲話會將七日冷靜期建議交畀立法會，希望盡快落實咁話。
話時話，近年不良營銷手法愈來愈猖狂，舊年有市民接到「八十八元美容試做價」促銷電話，結果被美容中心職員威逼利誘，碌卡一百萬買咗限半年內使用嘅近千次美容療程，於是搵消委會介入，點知對方只係肯退番三萬蚊咁大把，完全唔放消委會在眼內。鬼咩，好多利用不良營銷手法劏客嘅商戶，會同員工簽免責同意書，到出事嗰陣就辯稱對僱員行銷手法唔知情，又或者話已經炒咗個職員，逃避法律責任。若果港府真係有心要取締不良營銷手法，就應該對症下藥，搞七日冷靜期就唔應該再拖。
唔講唔知，類似立法規管預繳式消費，設立冷靜期嘅建議，港府相關部門早喺九八年已經提出過，拖到今時今日，二十年過去，依然係無聲無息，依家先至舊調重彈，將二十年前嘅冷飯翻叮，動作仲有冇再慢啲吖。仲有呀，以呢個政府嘅無能同冇效率，隨時又係爛尾收場，正所謂「庸官靠得住，豬乸會上樹」，如果唔係政府多年嚟放軟手腳，呢啲預繳式消費陷阱就唔會咁離譜，亦唔會有咁多消費者跌入陷阱，欠落一大筆錢，血本無歸，指望無能政府保障消費者，隨時都係嘥氣嘅咋。
當局設立冷靜期拖得就拖，好多人話係向班商家佬跪低。呢嗱，消委會建議一出，即刻引嚟業界好大反應，話覺得被標籤咗為奸商喎，好似呢啲行業都係呃人咁款，又話顧客玩嘢起上嚟，無條件取消合約，加重咗佢哋喺營運上嘅開支同負擔，可想而知立法阻力極大。不過點講都好，保障消費者權益，政府有責，雖則話不良營銷手法層出不窮，無良奸商識走法律罅劏客，但點都唔能夠成為廢官卸膊嘅藉口吖！