世界日新月異，好多新興玩意紛紛成為潮流，好似跳彈床咁吖，以前就話係體操運動嘅一種，時至今日已經冇咗呢條界線，彈床樂園仲開到成行成市添。之不過好玩還好玩，潛在風險同樣唔小，一個唔小心，隨時樂極生悲嘅咋。
呢嗱，近排香港出現唔少室內彈床樂園，吸引唔少年輕人同一家大細幫襯，仲有OL當運動減肥添。本報記者親身視察過呢種新興玩意，發現呢啲彈床樂園雖然客似雲來，但唔少人明顯忽視咗潛在危險。例如有場地提供八張彈床，只有兩名職員當值，隨時睇漏眼；又好似幾個小朋友同時跳一張彈床，分分鐘出現攬炒嘅牙煙情況；仲有呀，有年輕人不斷做出危險動作，結果失手撞落彈床邊嘅軟墊度，睇見都一額汗。話時話，有醫院近期接獲多宗玩彈床而脫臼、骨折嘅個案，有人甚至跌傷頸椎，差少少就癱瘓，醫生仲警告，玩彈床一旦失手，嚴重起嚟死都有之，都咪話唔得人驚。
講真，男女老少喺冇專業教練指導之下，你彈我又彈，固然係好好玩，但亦同玩命冇乜分別。大家都知，跳彈床係專業運動，仲係奧運項目，運動員都要經過長期苦練，未必人人玩得起o架。冇錯，商人打開門做生意，來者不拒都無可厚非，之但係港府隻眼開隻眼閉，對場地、人員、設施都冇監冇管冇要求，咁就點都講唔通喇。呢，好多場地貼個免責聲明出嚟就算，萬一真係有顧客出事，淨係法律爭拗都有排拗喇。所以話啫，官老爺一味懶懶閒，唔嗲唔吊，簡直不負責任。
唔係靠嚇o架，幾年前台灣粉塵爆炸造成嚴重傷亡，咪又係新興玩意玩出禍囉。呢類使用粉塵嘅大型活動香港以前都搞過，仲有過萬人參與添，消防同政府一直不聞不問，如果唔係台灣粉塵爆炸教訓深刻，港府都唔會取消之後嘅同類活動。冇計喇，四方木政府就係咁，唔踢唔識郁。
其實都唔使講到台灣咁遠，淨係航拍機呢種玩意都「新興」咗幾年，之前仲有人離譜到喺機場範圍玩航拍機添，之但係規管條例至今依然係天殘地缺，連內地都推出實名登記，港府就一味闊佬懶理，唔怪得早前有不法分子利用航拍機喺中港邊境走私啦。
講番跳彈床呢筆吖，記住玩還玩，最緊要量力而為。至於港府咯喎，一個連八達通都唔識用嘅特首，佢帶領嘅政府可以有幾與時並進，有幾跟貼潮流，大家心照喇。要港產官僚加強監管新興玩意喎，咪即係嘥氣，市民自己提高警惕仲實際！