睇戲睇得多，每逢太平紳士巡監倉，上頭例牌交足功課，搞到個場四四正正，名副其實「洗太平地」。呢頭京官南下督師掃黑除惡行動，嗰頭警方突然大發神威，搗破特大販毒集團，家陣知點解喇。
警方日前根據線報，喺屯門拘捕一名男子並檢獲三十幾公斤可卡因，市值高達三千三百萬港元。據講被捕男子係和勝和前坐館大毒梟「上海仔」郭永鴻嘅爪牙，警方相信毒品來自泰國及柬埔寨等地，主要供應新界區，涉及上海仔販毒集團咁話。
咁就奇喇，點解警方遲唔破大案，早唔破大案？懷疑幕後黑手早就着咗草，警方家陣至賊過興兵，仲有冇再遲啲呀？鬼咩，身兼公安部長嘅國務委員趙克志早前親自南下深圳坐鎮，指揮掃黑除惡行動，「大孖沙」駕到，香港警方唔落多幾錢肉緊，博食貓麵咩！話時話，呢一輪掃黑除惡行動認真唔講得笑，廣東警方短短幾日內偵破二千八百宗毒品案，拘捕三千幾人，繳獲毒品超過四噸，上面「行雷閃電」，香港警方就算做戲都要做到「刮風落雨」咁款，冇番幾千萬元「成績表」點見人吖。
唔怪得港產官僚成日畀人話好似四方木咁，唔踢唔郁，唔叫唔做。咪睇本港近年涉及三合會嘅罪案有所下降，就以為天下太平，其實只不過係警方放軟手腳造成嘅假象。警方話就話周不時掃蕩黑幫，睇真啲好多時都係雷大雨小，破嘅案細眉細眼，拉嘅犯魚毛蝦仔，繳獲幾百元賭款當一次行動，搗破一支球棒嘅「武器庫」又當一次行動，點止有姿勢冇實際，直頭交數咁交，敷衍了事，更莫講話部分前警隊高層涉嫌收受犯罪集團賄賂通風報信，有啲甚至同黑幫大佬稱兄道弟，拍住上搵食，香港有乜法子唔沉淪。
今次警方食生菜咁食，話咁易就粉碎特大販毒集團，可見佢哋掃黑「非不能也，實不為也」，亦再次證明個別警方高層充當黑社會保護傘、「警黑一家親」嘅傳聞並非空穴來風。最奇怪嘅係，黑幫分子見到上面雷厲風行掃黑除惡，唔避一避風頭不特止，反而繼續大模廝樣通街走，咪就係以為有保護傘罩住，可以攞正牌犯法囉。
所以話啫，香港地金玉其外，敗絮其中，平時有塊地氈冚住唔覺唔覺，家陣地氈一掀開，乜嘢蛇蟲鼠蟻、烏蠅曱甴一次過現晒形。嗱，咪話功夫茶唔提醒，領導人已經講到明，要將掃黑除惡同反腐敗結合起嚟，既捉涉黑組織，亦捉後面嘅「保護傘」。嚟緊又到一年一度「雷霆行動」，唔該警方打醒十二分精神，蛇蟲鼠蟻見一隻殺一隻，否則嘅話，保護傘分分鐘自身難保！