空氣污染未改善 環保數字遮羞布

呢，就講環保署尋日公布二○一六年香港空氣污染物排放清單吖，佢哋話喎，因為香港持續推行多項措施管制發電廠、船舶同車輛空氣污染物排放，所以空氣中二氧化硫、氮氧化物、可吸入懸浮粒子同微細懸浮粒子嘅排放量，唔止比前一年少最多一成一，自一九九七年起更加累計減咗三成九至七成八喎，吹到咁神乎其神，爭在未開口叫全港市民一人「給」隻大白兔過佢咋。

睇真啲，政府最叻做數，為咗粉飾太平，唔係未試過玩數字遊戲，早幾年就將數字搬來搬去淡化貧窮人口，空氣污染物排放要造假更加簡單啦，淨係測量儀器擺放位置已經可以出術，擺喺路邊、山頭、大街大巷定係大廈屋頂，得出嚟嘅數字已經差天共地，少啲車輛出入嘅地方，空氣梗好啲啦，環保署話香港空氣好咗，真係信你就傻。

坦白講，香港空氣有冇好到，市民有對眼睇，有個鼻聞，感受最真切，作到天花龍鳳嘅數據係呃唔到人嘅。呢，香港平時難見天日，大量嘅微細懸浮粒子喺空氣中積聚，就係哮喘、慢性支氣管炎、肺氣腫等疾病嘅元兇嘞，唔係嚇你，世衞估計香港每年平均有三千人死於空氣污染，路邊二氧化氮數字亦都創下十九年不達世衞標準嘅「佳績」，中環更加試過喺全球空氣質素調查中排尾八，就連澳洲政府外交部都試過喺官方網頁提醒國民，香港空氣污染嚴重，遊港時撞正高污染日子，要避免戶外活動，簡直係一巴摑落環保署塊面呀。

即係咁，政府改善唔到空氣質素，點止市民患病受罪吖，因此帶來嘅醫療開支，每年高達十七億港元，絕對唔嘢小。可惜吖，呢個政府仍然無動於衷，唔去正視問題，對症下藥，反而倒行逆施。仲有喎，英國、法國等歐洲國家早已決定二○三○年後不再使用燃油車，連內地都積極考慮緊全面使用電動車，港府就翹埋雙手，乜都唔做，仲話與國際接軌喎，簡直唔知個「醜」字點寫。更加莫名其妙嘅係，港府一時為電動車提供稅務優惠，一時又取消，神經錯亂。至於採用更清潔能源取代煤炭發電，都係講咗等於做咗。

所以話啫，環保署推出一大堆「亮麗」數字認叻，不過係遮羞布兼用嚟轉移視線嘅啫，可憐香港人衣食住行樣樣難，家陣連吸番啖新鮮空氣都成為奢侈享受，都咪話唔悲哀！