尋日有調查發現超過八成香港人都話，難以享受生活，超過三成精神健康仲亮起紅燈添。梗係啦，香港地生老病死皆不易，衣食住行樣樣難，有唔少人仲被迫住喺豆腐膶咁細嘅劏房或者納米樓，斗室困頓，時間耐咗唔出現精神問題都幾難。
目前香港有超過二十萬人住劏房，咁呢啲劏房細成點呢？調查發現，超過七成人住緊嘅劏房原來唔夠二百呎，有啲仲連七十呎都冇，仲細過人稱「水飯房」嘅單人囚室，不過價錢唔平o架，月租都要千五至三千五百港元，有五成劏房戶更加畀緊超過三千五百元月租。地方細仲要貴租，本來精神健康嘅都被逼到抖唔到氣啦。
其實唔單止無殼蝸牛住所環境惡劣，就算有樓一族都唔好得去邊。近年納米樓愈起愈多，愈起愈細，前幾年首次有細過二百呎嘅納米私人樓問世，發展商被輿論狂批賺到盡，冇良心；結果係點？結果係最近出現僅有四十三呎嘅單位。你話嘞，喺香港無論租劏房定係買愈起愈細嘅納米樓，港人捱生捱死，到頭來嘅居住空間竟然不如囚犯，喺呢種企起身就頭頂天、攤開手就撞到牆嘅「番梘盒」度居住，邊有幸福感可言呀？香港作為一個國際有名嘅大城市，竟然出現人不如囚犯嘅居住環境，你話係咪奇恥大辱嘞？
講真，香港房屋問題唔止嚴重，直頭係畸形，一方面窮人愈來愈少空間，另一方面有錢人住大屋不特止，仲要搞僭建，好似律政司司長鄭若驊咁吖，喺獨立屋地庫僭建逾五百呎額外空間，又Band房又私人影院又酒窖咁，笑罵由你笑罵，好官我自為之，吹呀！
話時話，林鄭成日話「房屋問題係重中之重」，又成立土地供應專責小組，又搞埋晒啲咩「土地大辯論」，狂掟十八個選項出嚟畀市民討論，講到好似好關心香港人房屋問題咁，實則咪又係研究復研究，諮詢復諮詢，到頭來都係浪費時間。林鄭與其煲無米粥，嘥鬼氣，不如拉大隊，搵埋問責官員中嘅「樓王」政務司司長「小肥張」及「僭建驊」等齊齊落區，去啲劏房「屈蛇」住番晚，體驗下民間疾苦好過啦，事關佢哋平日高床軟枕，官邸個廁所仲大過劏房戶一家大細屈埋嗰百零呎空間，又點知窮人房屋問題有幾迫切呀？
講開又講，前幾年有富豪為咗體驗生活而瞓街住劏房，事後話自己學咗好多嘢，同基層拉近咗距離，仲選埋立法會議員添，睇嚟林鄭真係要見賢思齊喇。不過咁，唔少劏房鼠患嚴重，木蝨又多，連八達通都唔識用、廁紙又唔知邊度買嘅林鄭，真係要有心理準備至得。