網上世界千「騙」萬化，正如一個經典廣告話齋，「型英帥靚正」網名嚟嘅啫，真正身份係「如花」。所以話，如果港府唔與時並進，加強監管，好多網上新型罪案話都冇咁易就攻陷本港。好似最近興起嘅「練功券」吖，咪即係偽鈔囉，由於幾可亂真，又容易從網上購入，搞到唔少人中招呀。
嗱，警方前晚拘捕咗一名蠱惑的士司機，佢涉嫌用練功券找贖，最少呃咗兩名內地旅客及一名本地外籍女子一千七百元車資。警方其後喺的士車尾箱及其寓所起出一百七十二張練功券，面值八萬幾蚊，由於偽鈔數量大，唔排除被捕的哥以練功券參與其他騙案喎。
所謂練功券，其實係內地銀行專門印製畀職員練習點鈔之用，由於像真度高，結果淪為不法之徒嘅行騙工具。呢，早前觀塘一間藥房就收過一張大牛練功券，好彩被醒目職員識破先至冇損失咋，點知事隔冇耐啫，又有的哥鋌而走險，你話練功券唔係已經大規模流入本港都冇人信咯。
唔係講笑，淨係淘寶已經有大量練功券出售，十蚊港紙就有一百張，要港幣有港幣，要人仔有人仔，連美金都有，仲講明包郵添，都咪話唔誇張。本港大律師睇過相關圖片，都話肉眼睇練功券像真度極高，足以魚目混珠，不法之徒用嚟呃遊客、婆仔一啲都唔出奇。有人擔心練功券隨時係繼祈福黨、電騙案後又一新興罪案，唔係杞人憂天o架。
即係咁，一個巴掌拍唔響，練功券之所以咁容易流入市面，內地政府無監無管固然係罪魁禍首，但港府後知後覺一樣難辭其咎。喂，喺香港管有及行使偽鈔不嬲係嚴重罪行，最高可判監禁十四年，以前就話止於地下交易啫，但隨住互聯網發展一日千里，內地網購大行其道，偽鈔變成唾手可得，早就變成明目張膽嘅犯罪嘞，港府一味懵盛盛，烏瀡瀡，既冇主動阻截，又冇通報內地，兼且冇提醒市民提高警惕，你話係咪靠害吖。難為當局聲稱打擊偽鈔唔手軟喎，甚至連拍戲用嘅道具鈔票、印喺報紙上嘅樣本支票，都話有嚴格規管，前排仲話有電影製作人管有道具鈔票而被告上法庭添，偏偏對網上氾濫成災嘅練功券視而不見，放任自流，有冇再離譜啲吖！
不過諗落又冇乜出奇嘅，事關港產官僚乜都唔缺，最缺腦汁。睇吓特首林鄭月娥連八達通都唔識用，就知高官連少少常識都冇，要佢哋留意互聯網罪行喎，咪即係緣木求魚。冇計嘞，高官靠得住，豬乸會上樹，依家惟有指望警方加強打擊，市民亦要打醒十二分精神吖。