啋啋啋！新年流流搞啲咁嘅嘢，大吉利是咩！
話說錦田東坑嶺有一幅大約一公頃嘅濕地，位於林村郊野公園邊陲，本來係荒廢魚塘，鄰近有不少古墓同古蹟，包括風水名穴之一「荷葉跋龜」，以及鄧氏祖墳等等。既然叫得做風水名穴，梗係應該好好保護㗎啦。點不知，環保組織長春社去年十一月發現當地有人非法傾倒泥頭，至今年一月中旬情況愈來愈嚴重，附近經常有泥頭車停泊。長春社公共事務經理李少文認為，當地極具保育以及歷史價值，質疑政府點解唔將相關一帶列入「郊野公園不包括土地」名單之內。
呢嗱嗱嗱，你話係咪大吉利是吖？話明係風水名穴古墓古蹟，當然係敬奉先人嘅安樂窩，你亂咁傾倒泥頭破壞環境，即係褻瀆神明啫。打個譬喻吖，若然有人喺你祠堂門前隨地吐痰、亂丟垃圾，你唔覺得尊嚴受損就奇咯。
規劃署發言人話喎，涉事地點被劃作農業地帶，如果未取得城規會發出規劃許可，傾倒泥頭係犯法嘅。規劃署去年已對違例發展採取執管行動，並於十一月向有關人士發出強制執行通知書，其後違例發展已中止。可惜吖，規劃署似乎冇乜牙力，人哋睬佢都傻，相關地段隨後又有填土活動，而且範圍擴大咗添。
至於環保署又點講呢？佢哋話正在聯絡相關地主跟進同調查，如果發現違規，就會採取行動。
唉，講到非法傾倒泥頭，錦田風水名穴都唔係第一個受害者咯。冇耐前之嘛，孕育本地超過一半雀鳥品種嘅重要濕地塱原，鄰近河上鄉村民發現大片農地同埋魚塘被建築廢料覆蓋，泥頭車出出入入肆無忌憚傾倒泥頭。村民向政府部門投訴啦，得到嘅回應係你推我讓，警務處啦，環保署啦，規劃署啦，地政處啦，統統耍手擰頭話唔關佢哋事。
更加荒謬嘅係，有市民跟蹤出入河上鄉農田嘅泥頭車，原來泥頭車係去完粉嶺和合石嘅建築署地盤之後，再駛去河上鄉。換言之，廢物來自政府官方工程！
跟住落嚟仲恐怖，規劃署要求河上鄉村民將農田回復原貌，即係清晒所有廢物，如果唔係，提出檢控！
講到破壞環境，特區政府一眾官僚簡直係帶頭開創壞先例。喂，記唔記得環境局局長邱騰華企圖侵佔清水灣郊野公園開闢垃圾堆填區呀？又記唔記得食環署為咗滅蚊，竟然將深水灣谷嘅原生物種趕盡殺絕，造成生態大災難呀？至於放任大浪西灣興建私人豪宅等等劣行，多不勝數咯。
至於今次錦田風水名穴出現滿目瘡痍嘅泥頭，有冇機會撥亂反正呢？規劃署可唔可以做番一齣好戲保護當地環境呢？計功夫茶話齋，唔係話絕對冇機會嘅，不過有必要先做一項手續咁解囉。呢一項手續就係搵人去大埔林村許願樹拋一個寶牒，誠心誠意許一個願望：官老爺回頭是岸，莫再帶頭搞破壞，放下屠刀，立地成佛，善哉善哉！