功夫茶考考大家，知唔知有乜嘢工種係唔怕失業嘅呢？大家可能會話，咪玩啦，今時今日邊有咁大隻蛤乸隨街跳，雖然經濟情況叫做好咗少少，之但係始終係世界難撈吖嘛，冇可能唔怕失業喎。
冇錯，正常而言人人都怕失業，不過真係有例外o架，而且最少有兩類工種。第一類唔怕失業嘅工種係公務員，第二類就係護士嘞。公務員之所以衣食無憂，原因係受到超穩定嘅制度保障，做錯事都唔驚炒魷魚。至於護士咯喎，原因係求過於供，人手缺乏極之嚴重。
呢嗱，公立醫院再次出現護士逃亡潮，流失率創下五年新高。醫管局去年護士流失率飆升至百分之五點一，較○九年激增三成四。
根據最新數字顯示，公立醫院二○一○年流失九百七十一名護士，重災區依次為內科、兒科、外科、婦產科以及精神科。當中以精神科情況最慘烈，去年流失五十五名護士，較○八至○九年度激增近一點四倍。兒科同婦產科護士流失人數不遑多讓，去年九十六名兒科護士離職，較○八至○九年度增三成；婦產科有六十人離職，增幅多達兩成半。
講到呢度，大家明未？白衣天使既然走一個少一個，即係話只要你唔係自己劈炮唔撈，等人用嘅醫院冇可能炒你魷魚，失業嘅機會率係零。正正因為護士係「皇帝女唔憂嫁」，所以私家醫院不惜出動銀彈政策向公立醫院高薪挖角。好似養和醫院咁吖，註冊護士起薪點較醫管局高三點，月薪連津貼二萬八千多元，相當和味o架。仁安醫院亦都唔弱，護士薪酬較醫管局高兩點，大約二萬六千元。
大家可能會話，喂，護士人手短缺好牙煙啫，一來病人未必得到適當照顧，二來隨時忙中有錯，萬一又整多幾劑醫療失誤，唔知邊個咁唔好彩又死於非命，點算呀？因乜解究特區政府嘅醫療官僚唔諗辦法增加護士人手呀？
唉，歸根究柢都係官老爺嘅錯，搞到全人類心慌慌。醫管局○三年推出肥雞餐，引誘七百名資深護士自願退休，然後，哈，一嘢關閉護士學校喎。你唔再培訓護士吖嘛，咁咪搞到十個樽只得七個蓋囉。
所以話啫，幫政府打工真係好過癮o架，做錯事都唔驚炒魷魚，經典人辦係孭鑊經驗非常豐富嘅食物及衞生局局長周一嶽。
由於周局長管理無方，成個醫療系統千瘡百孔，醫生有醫生忙到想嘔，護士有護士走夾唔抖，病人有病人惡頂難受。就以護士人手短缺為例吖，逃亡潮老早出現啦，周一嶽點解唔諗辦法解決呢？當初點解咁短視關閉護士學校呢？部分護士學校雖然陸續重開，可惜遠水不能救近火。正如仁安醫院護理總監張群友話齋，有經驗嘅護士已經退下火線，新畢業嘅護士起碼入職兩年先至可以獨立工作，入職八年以上先至叫做有經驗。
都係嗰句，功夫茶祝各位身體健康冇病冇痛，否則一旦落入周一嶽之流嘅失職醫官手上，唔病死都嚇死啦！