好咯好咯！農曆新年就快到，大家又可以出雙糧，大家又可以辦年貨，大家又可以慶團圓！
一提到辦年貨，少不免要買年花；一提到買年花，功夫茶不期然勾起一段唔算好美麗嘅回憶。唔記得係邊年咯，過氣特首董建華講過要將香港打造成「鮮花港」。
其實講句認真說話，鮮花港呢一個概念唔錯㗎，事關賣花確係一盤大生意。就以香港本身為例吖，每年從外地或內地輸入嘅鮮花盆栽涉及金額數以億元計，單係去年頭十一個月已經輸入總值三億一千七百萬元花草樹木，當中來自內地嘅超過二億元。亦即係話，假如香港真係一個鮮花港，淨係內需已經足以餵飽唔少老百姓，若然加上出口咯喎，賣花唔使讚花香都有飯食啦。
不過可惜吖，概念雖然唔錯，一旦落到無能而治嘅官老爺手上，蚊都瞓，蛇都死，老董都要腳仔痛。
功夫茶之所以重提鮮花港舊事，無他嘅，挨年近晚本來係花農最賺錢嘅旺季，不過佢哋家陣谷到一肚氣，隨時被迫做埋「明日黃花」。事緣係地政總署近年一反常態，由過往每隔幾年續租農地一次，改為年年續租，搞到花農人心惶惶，擔心被政府以「公共用途」為由收回農地，花農就會血本無歸。
根據漁護署資料顯示，香港農地面積於九○年共有八千一百四十萬平方米，大約係四百三十個維多利亞公園，去到○九年咯喎，農地面積降至六千零二萬平方米，下跌兩成七，足足係百幾個維園。
呢嗱嗱嗱，大家可能會話，香港擺明係一個重商輕農嘅金融城市，去股票市場「種金」好過啦，種乜鬼嘢花吖。計功夫茶話齋，呢鋪說話真係要戒，事關今時今日最重要嘅生活態度之一係保育，連特區政府成日都播放宣傳片教人「綠色生活，我鍾意」啦，你去收回農地大興土木建造一座又一座石屎森林，咁咪有違保育原則囉。
記唔記得冇耐之前搞到七國咁亂嘅反高鐵事件呀？不惜苦行又跪又拜嘅示威者其中一個訴求係唔想香港變成千篇一律嘅「商場」，希望保留面臨清拆厄運嘅石崗菜園村，等務農維生嘅村民繼續過佢哋歸園田居嘅簡樸生活。可惜吖，高官硬係漠視民意，卒之咪發展到包圍立法會囉。
好嘞，睇番花農，人哋與世無爭務農維生，點解唔畀一條生路佢哋行呢？年年續租等於朝不保夕，點解唔准佢哋長期租地呢？唉，香港嘅石屎森林已經夠多㗎喇，冇必要再陰乾花農騰出土地興建備受爭議嘅另類高鐵啫！
嗱嗱嗱，香港人嘅保育意識真係愈來愈高，好似元朗南生圍咁吖，一話有地產商想起樓，馬上有人吹雞抗爭。原本用嚟種花嘅農地萬一又變成地產項目，肯定又係犯眾憎。
總而言之，好心官老爺生性啦，唔好亂咁破壞綠色生活，正如郊野公園唔應該用作垃圾堆填區，種花嘅農地都唔應該變做地產項目。你即使唔保育，都唔好絕育吖嘛，畀人叫你一聲「摧花賊」就該煨咯！