民意繼續反 申亞仍死撐

哎吔吔吔,點解曾氏宗親會成員咁死要面子㗎?點解死要面子得嚟又漠視民意㗎?人哋都話唔鍾意你浪費公帑亂咁申辦亞運咯,同姓三分親嘅一眾官僚硬係唔聽人講嘢嘅,簡直畀佢吹到啤一聲!

呢嗱,一個姓曾嘅叫做曾蔭權,佢呼籲立法會議員以香港長遠利益為依歸,投票支持申辦二○二三年亞運會。煲呔曾話喎,明白反對人士嘅關注,不過未來政府對教育、醫療同福利嘅開支超過二萬億元,唔會因為申亞而減少,嚟緊嘅十二年政府亦會撥出七十億元加強支持運動,即使申亞不成功,開支亦唔會減少。

至於另一個姓曾嘅,係由始至終不斷硬銷「亞運概念」嘅民政事務局局長曾德成。德成局長喺網上撰文話喎,未來十二年投放六十億元申辦亞運係可以應付嘅開支,唔會影響其他方面嘅投入,現時各區正為十八項體育場地及設施開工,總投資超過一百億元。呢一位曾氏宗親會成員又強調,政府已為體育發展政策訂下普及化、精英化、盛事化嘅明確方向,現時各區已增建不少體育設施,市民參與運動嘅熱情上升,係政府長遠體育政策嘅結果。

唉,好心德成局長唔好自吹自擂自己讚自己啦,乜市民參與運動嘅熱情上升咗咩?即使真係熱情上升,真係應該歸功於官老爺咩?咪玩啦,甲組足球聯賽入座率低到拍烏蠅,其中一大原因正正係政府冇乜支持,球賽乏善足陳吖嘛,梗係冇觀眾啦。仲有,政府又唔肯或者唔敢手起刀落重組亂七八糟嘅足球總會,搞到球壇半死不活,歸你個頭,功你條命!

睇下香港大學嘅民意調查點講吖,大約百分之五十七受訪者反對申辦或者非常反對申辦亞運,贊成嘅只有百分之三十。負責調查嘅鍾庭耀表示,十二月初曾經有四成人支持申亞,其後回落到三成嘅水平,支持率一度上升嘅原因同香港運動員喺廣州亞運表現出色有關,不過影響只屬短期。

所以話啫,官老爺的而且確漠視民意,打從第一日開始已經反對多過支持,死得佢吖,佢話申辦就申辦喎,完全當廣大市民透明。

唉,功夫茶成日都話,申辦亞運唔係話唔得,不過唔應該本末倒置吖嘛。打個譬喻,一個男仔未去識女仔培養感情,失驚無神話要搞個世紀婚禮,係咪好無厘頭呢?你又冇體育設施,你又冇訓練選手,你更加冇同七百萬市民培養好積極投入體育運動嘅感情,申乜鬼辦亞乜鬼運吖!

家陣兩個曾氏宗親會成員話就話撥出資源加強支持運動,可惜吖,同一大話係唔可以講兩次嘅。大家記唔記得十年前香港曾經申辦過亞運呀?當時夠滿口承諾大興土木打造運動場館啦,家陣依然係乜都冇。

計功夫茶話齋,撇開其他因素不論,呢一場官民角力其實都幾過癮,民意繼續大反特反,申亞仍然一味死撐,人民內部矛盾不同凡響。如果可以嘅話,功夫茶希望官場政壇之中所有姓曾嘅全部一字排開,曾蔭權啦,曾德成啦,曾俊華啦,曾鈺成啦,最好人人捧住九龍皇帝曾灶財嘅神主牌,幾個傻佬擘大喉嚨振臂高呼「申亞走唔甩、香港一定得」,娛樂性都相當豐富㗎!