平機會無理取鬧，代表一名抑鬱症及妄想症患者濫告《太陽報》及東方報業集團，指○六年一篇專欄文章涉嫌中傷精神病患者，觸犯《殘疾歧視條例》，前日喺區域法院被裁定指控不成立。不過咁，東方雖然贏咗官司，但就要自行支付一百四十萬元律師費，贏咗官司輸咗錢，簡直荒謬到極，令人哭笑不得。事件曝光後，社會各界嘩然，紛紛炮轟平機會係又告唔係又告，離晒大譜。
呢，呢啲就叫做公道自在人心喇。係人都睇得出，《太陽報》嗰篇文章係為精神病人爭取權益，完全唔涉及所謂歧視，點知平機會居然掉轉嚟睇，斷章取義，砌詞誣告。正如執業大律師龔靜儀話齋，「一篇文章冇可能大家睇到嘅差別咁大」。其實，呢單畸士根本唔需要乜嘢證據，就算純粹閱讀文章，都可以作出類似法庭嘅合理判決，平機會斷估冇辛苦，貿然提出訴訟，唔止對被告唔公平，直頭係打壓傳媒喇。
話時話，今次已經唔係第一次㗎喇。早年平機會亦曾未經查清投訴內容，就草率發信要求並無涉及殘疾中傷嘅《太陽報》進行調解，其後經《太陽報》自行舉證，平機會先至好似瞓醒咁，知道擺咗一個大烏龍，涉事嘅原來係另一報章。唉，平機會連邊張報紙都分唔清，連一篇評論文章講緊乜嘢都唔知，仲話要維護人權，創造平等機會，真係笑大人個口！
立法會議員王國興就講得啱嘞，平機會亂告一通，久不久就嚟騷擾一次，畀人嘅印象係打壓傳媒，實在不得人心。講到打壓，其實都見怪不怪咯，咁多年嚟，港府各個部門及機構輪流上陣，選擇性針對東方報業集團，早就罄竹難書；而最卑鄙嘅係，呢班港英餘孽一邊打壓正義傳媒，另一邊就不斷包庇誨淫誨盜嘅壹淫媒，百擒百縱不特止，仲採取幾重標準，告一間唔告一間。呢，當年《東方日報》、《太陽報》、《蘋果日報》同日刊登外國女星Kelly Brook同一輯性感照片，結果《東方》及《太陽》被評為二級不雅，爛果報就被評為一級非不雅，而香港有售嘅外國雜誌《NOW》連送檢都慳番添。喺一種制度之下，出現三種唔同嘅評級，如果話港英餘孽唔係惡意針對東方，你信唔信吖？
咁多年嚟，喺港府無理打壓之下，東方報業唔止勞心勞力，更加花費咗龐大訴訟費，最慘仲係經常贏咗官司輸咗錢，就好似今次呢單畸士咁。唔怪得有人質疑，港英餘孽玩針對，久不久就嚟滋擾東方，背後係有不可告人嘅政治目的。乜嘢政治目的？咪就係要搞到東方報業煩不勝煩，自動放棄囉。到時咯喎，一係被人收購，一係被人合併，香港從此成為反中亂港傳媒嘅天下，港英餘孽又少咗個眼中釘，咪一天都光晒囉。反正香港妖孽為患，是非顛倒，與其咁戇居愛國愛港，不如齊齊反中亂港好過。呢，歌仔都有得唱喇，愛國愛港冇前途，反中亂港有運行！
話時話，本港兩間免費電視台已先後易主，背後原因耐人尋味，所以呢，如果話有人打報紙主意，都唔係冇可能㗎。不過咁，打主意還打主意，最緊要光明正大，唔好再出埋呢啲那渣招！