財金官員開口埋口都話量入為出，仲講到明呢家嘢係《基本法》嘅規定，查實量入為出到底係乜嘢意思？其實意思好簡單啫，當你收入多嘅時候，支出咪不必死慳死抵囉，當你收入少嘅時候，支出咪必須閂細水喉囉。
好嘞，既然《基本法》規定政府必須量入為出，當庫房錢多到水浸嘅時候，支出反而少得可憐，咁係咪違反《基本法》呀？難怪勞聯李鳳英質疑，政府財政儲備不斷增加，又冇投放資源解決結構性問題，「量入唔出」係不符合《基本法》嘅。
尋日喎，立法會辯論公共財政政策，議員批評政府累積過多財政儲備，通過一項冇約束力嘅議案，要求維持十五個月政府開支作為儲備就夠嘞，其餘千幾億元用嚟解決社會問題。議員仲學足政務司司長唐英年訓斥八十後嘅口脗，炮轟政府如果再「剛愎自用」，僅以一次過措施暫時紓緩民間疾苦，最終「車毀人亡」嘅只會係特區政府。
唉，講來講去又係孤寒財主綜合症候群嘅老毛病發作。大家都知啦，政府最鍾意玩高估開支、低估收入嘅「狼來了」策略，搞到庫房年年水浸。就好似今個財政年度咁吖，話就話估計赤字二百五十二億，實際上盈餘隨時超過七百億，一來一回講緊嘅係接近一千億元「橫財就手」。立法會會計界代表陳茂波講得冇錯，佢怒斥儲備水平每年盲目累積，遠多於捍衞港元嘅需要，對基層市民視若無睹，直情係一個「墨守成規守財奴」。
唔好以為本地薑先至滿腹牢騷，外國朋友同樣英雄所見略同。美國傳統基金會以及《華爾街日報》連續十七年封香港為全球最自由經濟體，表面上風風光光，之但係人哋根本睇唔過眼。《華爾街日報》開宗明義講到明，香港嘅儲備太多嘞，妨礙經濟發展嘅競爭力，假以時日必被步步進逼嘅新加坡取而代之。該報社論版總編輯芮育光老實不客氣咁話，根本唔明白何以政府要手握市民咁多嘅錢，促請政府將儲備減半，利用減稅等等方法還富於民。
一提到「量入唔出」，功夫茶不期然諗起中國古代傳說一隻怪獸。話說龍生九子，一曰貔貅（發音：皮休），呢隻怪獸厲害咯，不但神通廣大，而且食量無窮，最鍾意食嘅係金銀珠寶。更加令人刮目相看嘅係，貔貅係一隻冇肛門嘅怪獸，於是乎，能吞萬物而不瀉。風水堪輿大師將貔貅視作「招財王中王」，貪佢「大吃三方、大小通吃、有入無出」。假如你信風水又想發財，你只要搵一隻貔貅吉祥物，然後銅錢塞肛門，咁就風生水起嘞。
即係咁，特區政府十足十就係一隻有入無出嘅食錢獸，自己食到肥頭耷耳，懶理百姓水深火熱。喂，記唔記得香港有超過一百萬收入低過綜援水平嘅窮苦大眾呀？坐擁幾千億儲備而拒絕出錢出力紓解民困，好冇品啫！
計功夫茶話齋，最近北非突尼斯發生嘅「茉莉革命」，又稱「飢餓革命」，值得財政司司長曾俊華引以為戒。飢餓人民一旦揭竿起義，真係會車毀人亡o架！