有個笑話睇怕大家都聽過，外國人一旦嚟到中國人嘅地方，萬一人有三急必須搵廁所解決，方法其實好簡單，唔使搵地圖，不必問路人，更加毋須出動尖端科技ＧＰＳ，淨係靠自己個鼻聞一聞就足夠確定廁所位置。事關中國人嘅廁所特別臭，而且係蔫崩爛臭嗰隻臭，初到貴境嘅外國朋友根本毋須擔心人生路不熟，聞一聞，索一索，水到渠成舒筋活絡！
當然啦，搵得到廁所唔代表你敢用嚟解決生理需要，好多人一見到污糟邋遢嘅惡心場面係點都冇辦法完成排泄工程嘅。
呢嗱嗱嗱，唔好以為淨係普普通通嘅廁所充滿中國人特有嘅髒亂風格呀，接待國際貴客嘅港澳碼頭一樣係咁臭氣熏天。你知啦，港澳碼頭以前嘅用家就話局限於港澳同胞啫，但係隨住澳門發展一日千里，全球各國嘅旅客都會慕名而至，臭到冇朋友嘅廁所唔止失禮死人，簡直趕客添啦！
本報記者最近去過港澳碼頭內外直擊，總結出令香港蒙羞嘅六宗罪——
第一宗罪：廁所邋遢惡臭。喂，話就話方便用家以最快捷嘅時間搵到廁所位置啫，假如真係有人頂唔順骯髒不堪嘅情況而選擇死忍爛忍，容乜易忍出病㗎，該煨！
第二宗罪：廁所標示混亂。呢家嘢經常搞到男性用家尷尷尬尬，原本港澳碼頭之內嘅男廁以藍色標示，女廁則以紅色標示。吖，唔知邊個咁大整蠱，部分女廁居然又用藍色標示喎，結果就導致男子漢大丈夫一時大意誤闖女廁，面懵懵走番出嚟都叫做問題不大，若然有人花容失色大叫色狼都唔知點算好。
第三宗罪：大堂滿地垃圾。功夫茶真係唔明，大堂設計已經灰灰暗暗死氣沉沉㗎啦，仲要搞到滿地垃圾冇人掃，係咪嫌錢腥呀？係咪要趕走晒送錢畀你使嘅外地遊客先至安樂呀？
第四宗罪：大堂欠缺清理。所謂欠缺清理，意思係話到處積塵，玻璃又唔抹，扶手又污糟，總之就係反胃。
第五宗罪：上落船捱風雨。上船落船嘅通道話就話有瓦遮頭，可惜覆蓋範圍有限，大風大雨少少都搞到你裙拉褲甩。仲有喎，所謂鐵鏈圍欄形同虛設，乘客一不小心就會跌落海。
第六宗罪：工地危機重重。港澳碼頭經常有維修工程，可惜安全意識直情冇眼睇，擺滿雜物不特止，連利釘都可以隨便亂放。
唉，成日都話香港家陣要靠旅遊產業救命，有乜可能容許港澳碼頭甩皮甩骨先？難得海事處發言人仲好意思大言不慚，佢話該處員工每日都檢查碼頭各項設施，包括廁所清潔以及衞生狀況。檢查完都係繼續臭氣熏天，可能海事處捉字蝨啩，所謂每日檢查嘅意思大概係「每日用一秒鐘時間」。
話時話，功夫茶真係好衷心希望中國人嘅廁所係唔臭嘅，畢竟旅客離開港澳碼頭之後有好多機會接觸其他廁所。若然旅客聞到你一廁還有一廁臭，唔通香港要改名臭港咩！