西九行政總裁謝卓飛上任五個月就劈炮，淪為一場國際鬧劇，講就講係健康理由，其實真正原因可能只有佢自己至知。
西九管理局薪酬委員會主席單仲偕尋日回應事件，除咗循例感到「驚訝及惋惜」，又承認謝卓飛請辭對管理團隊帶嚟負面影響，會諗辦法補救喎。點補救？當局聲稱正喺全球物色猛人接手，預計六到九個月後會有結果，仲話打算擴充人手，明年年底前西九管理局會由五十幾人增加到約一百人。而最過癮嘅都係呢句：研究調整薪酬挽留人才喎。
有冇搞錯！西九文化區一拖十幾年，家陣仲係爛地一塊，管理局高薪厚祿，不遠萬里由英倫請個洋和尚返嚟，打咗幾個月齋，話唔撈就唔撈，當局唔檢討吓招聘程序同遴選機制出咗乜問題，反而話要擴充人手，調整薪酬，有冇離譜啲吖？
再講，西九行政總裁每年俸祿三、四百萬，高過英國多多聲，謝卓飛劈炮唔撈，佢自稱係健康理由，同薪酬根本冇關係，當局無端端要檢討薪酬，簡直係九唔搭八。
管理局話，近兩年有四分之一員工流失，現時嘅薪酬架構係金融海嘯後訂立，可能欠競爭力喎。喂，家陣打工仔邊個人工唔係同金融海嘯嗰陣差唔多㗎？再講，西九管理局成立以嚟都唔知做過啲乜，話唔埋有員工係因為成日無所事事，或者係因為頂唔順官僚作風而下堂求去，例如嗰位上任七日就劈炮嘅前行政總監就係咁喇。西九大計十畫未有一撇，當局就話要加人工，咁豈不是未見官先打三十大板，擺到明打納稅人荷包！
解鈴還須繫鈴人，話到尾，西九文化區留唔住人才，問題在於政府。呢個項目議而不決，一波三折，推倒重來，到依家仲係無影無蹤，但係管理層就好似走馬燈咁，轉嚟轉去，你話嘞，上面阿頭車輪咁轉，下面班員工仲邊有心機做嘢吖。
最攞命嘅係，香港出咗名叫文化沙漠，但港府好大喜功，冇咁大個頭偏要戴咁大頂帽，為咗打造所謂世界級文化藝術中心，高薪請洋和尚嚟唸經，點知面對港府官僚文化同盤根錯節嘅利益關係，洋和尚「水土不服」，無從入手，壯志難酬，唔病至奇啦。
正如有藝術團體負責人話齋，謝卓飛辭職反映西九管理層錯估形勢，文化區管理人需要熟悉中西文化及香港情況，而且要具備雙語能力，以免出現太大嘅文化衝擊。即係話，過江龍未必好過本地薑，知唔知吖！
話時話，西九文化區留唔住人才已經成為結構性問題，當局要做嘅係盡快收拾殘局，如果唔改變官僚作風，減少干預，請乜嘢人做行政總裁都係嘥氣！